少年的
《少年的》Siàu-liân–ê
蔡義德Tshuà Gī-tik
——————————————
少年的你幾歲
siàu-liân–ê lí kuí huè
感情敢知進退
kám-tsîng kám tsai tsìn-thuè
輸贏敢通跋遐濟
su-iânn kám thang pua̍h hiah tsuē
少年等一下
siàu-liân tán–tsi̍t-ē
人生著看詳細
jîn-sing tio̍h khuànn siông-sè
跤步毋免走若飛
kha-pōo m̄-bián tsáu ná pue
油門毋通催到底
iû-mn̂g m̄-thang tshui kah té
較巧咧較巧咧
khah khiáu–leh khah khiáu–leh
身軀是家己的
sin-khu sī ka-tī ê
老大的若欲做
láu-tuā–ê nā beh tsuè
性命若拍毋見
sìnn-miā nā phàng-kìnn
欲佗揣欲佗生
beh toh tshuē beh toh senn
憂愁何必怨社會
iu-tshiû hô-pit uàn siā-huē
較巧咧較巧咧
khah khiáu–leh khah khiáu–leh
人生是家己的
jîn-sing sī ka-tī ê
血毋通烏白流
hueh m̄-thang oo-pe̍h lâu
汗免驚滴偌濟
kuānn bián-kiann tih guā-tsē
一定會一定會
it-tīng ē it-tīng ē
得著世間所希望的寶貝
tit-tio̍h sè-kan sóo hi-bāng ê pó-puè
少年的咱有緣
siàu-liân–ê lán ū-iân
才會當講遮濟話
tsiah ē-tàng kóng tsiah tsē uē
因為你想的夢的
in-uī lí siūnn–ê bāng–ê
愛的等的
ài–ê tán–ê
我嘛攏經過
guá mā lóng king-kuè
