厝的人
《厝的人》Tshù ê Lâng
蔡義德Tshuà Gī-tik
——————————————
厝是永遠有溫暖
tshù sī íng-uán ū un-luán
阮若出外欠一人
gún nā tshut-guā khiàm tsi̍t-lâng
爸母總是會操煩
pē-bú tsóng-sī ē tshau-huân
大大細細的平安
tuā-tuā sè-sè ê pîng-an
將心比心囝來牽
tsiong sim pí sim kiánn lâi khan
換咱掛心日到暗
uānn lán khuà-sim ji̍t kàu àm
手抱幼兒攬絚絚
tshiú phō iù-jî lám ân-ân
一粒心肝縛伊規世人
tsi̍t-lia̍p sim-kuann pa̍k i kui-sì-lâng
爸母晟咱咱晟人
pē-bú tshiânn lán lán tshiânn lâng
養育恩情天地重
ióng-io̍k un-tsîng thinn-tē tāng
啥人出外
siánn-lâng tshut-guā
已經幾若冬
í-king kuí-lō tang
啥人厝內
siánn-lâng tshù-lāi
孤單戇戇仔等
koo-tuann gōng-gōng-á tán
一頓飯
tsi̍t-tǹg pn̄g
會當圍予滿滿滿
ē-tàng uî hōo buán-buán-buán
一个岫
tsi̍t-ê siū
毋通放予空空空
m̄-thang pàng hōo kha̋ng-khang-khang
轉來有孝爸母啊
tńg-lâi iú-hàu pē-bú–ah
咱厝的人
lán tshù ê lâng
