啥物樂
《啥物樂》Siánn-mih *Ló
蔡秋鳳Tshuà Tshiu-hōng
————————–
九九講是天公牌
kiú-kiú kóng sī thinn-kong pâi
空空講是地王牌
khòng-khòng kóng sī tē-ông-pâi
若著四四講會害
nā tio̍h sù-sù kóng ē hāi
啊現代人是真趣味
ah hiān-tāi-lâng sī tsin tshù-bī
出門行路是頭敧敧
tshut-mn̂g kiânn-lōo sī thâu-khi-khi
正途的生理放一邊
tsiànn-tôo ê sing-lí pàng tsi̍t-pinn
啊講啥物袂赴市
ah kóng siánn-mih bē-hù-tshī
規粒頭殼是全牌支
kui-lia̍p thâu-khak sī tsuân pâi-ki
１２３４５６７
tsi̍t nn̄g sann sì gōo la̍k tshit
啊透早起床來逼籤詩
ah thàu-tsá khí-tshn̂g lâi pik-tshiam-si
中晝是電子計算機
tiong-tàu sī tiān-tsú kè-sǹg-ki
半晡仔包壇來問童乩
puànn-poo-á pau-tuânn lâi mn̄g tâng-ki
啊暗頭仔?來去看浮字
ah àm-thâu-á tshuā lâi-khì khuànn phû-jī
半暝仔喔~夢啊夢牌支
puànn-mî-á–ooh~ bāng–ah bāng pâi-ki
夢啥物
bāng siánn-mih
我夢著一隻豬
guá bāng-tio̍h tsi̍t-tsiah ti
啊夢豬講十二
ah bāng ti kóng tsa̍p-jī
閣夢啥物
koh bāng siánn-mih
我夢著西湖靈隱寺
guá bāng-tio̍h Se-ôo Lîng-ún-sī
濟公活佛咧破天機
Tsè-kong ua̍h-hu̍t teh phuà thian-ki
拄好欲破向當時啊
tú-hó beh phuà hiòng-tong-sî–ah
雄雄煞驚醒
hiông-hiông suah kiann tshínn
雄雄煞驚醒
hiông-hiông suah kiann tshínn
阮一个老厝邊
gún tsi̍t-ê lāu-tshù-pinn
舊年簽甲向當時
kū-nî tshiam-kah hiòng-tong-sî
毋捌著半支
m̄-pat tio̍h puànn ki
想著是真厭氣
siūnn-tio̍h sī tsin iàn-khì
衰衰樂講袂歹奕
Sue-sue-*Ló kóng buē pháinn ī
省本又多利
sénn pún iū to lī
不出牌算三十支
put-tshut-pâi sǹg sann-tsa̍p-ki
這改是百面等領錢
tsit kái sī pah-bīn tán niá-tsînn
一下開 講對對著七支
tsi̍t-ē khui, kóng tuì-tuì tio̍h tshit-ki
啊七朵花講較有錢
ah *Tshi*Tôo*Hua kóng khah ū-tsînn
好䆀嘛著試
hó bái mā tio̍h tshì
會仔錢先共提來奕
huē-á-tsînn sing kā the̍h lâi ī
啊欲好額嘛著看這期
ah beh hó-gia̍h mā tio̍h khuànn tsit kî
一下開 講著三蕊
tsi̍t-ē khui, kóng tio̍h sann-luí
去予四蕊的捧捧去
khì hōo sì-luí–ê phóng-phóng–khì
捧捧去
phóng-phóng–khì
話若欲講透機
uē nā-beh kóng thàu-ki
我目屎會拭袂離
guá ba̍k-sái ē tshit buē-lī
啊會仔錢是逐陣死
ah huē-á-tsînn sī ta̍k tīn sí
貨款是全票期
huè-khuánn sī tsuân phiò-kî
親情朋友是走去覕
tshin-tsiânn pîng-iú sī tsáu-khì bih
厝邊頭尾是借無錢
tshù-pinn-thâu-bué sī tsioh bô tsînn
勸恁朋友著覺醒
khǹg lín pîng-iú tio̍h kak-tshínn
啥物樂也扯予離
sánn-mih *Ló ā tshé hōo-lī
正當生理較濟錢
tsìng-tong sing-lí khah tsē tsînn
樂啊樂啊你毋通迷
*Ló–ah *Ló–ah lí m̄-thang *mî
樂啊樂啊你毋通奕
*Ló–ah *Ló–ah lí m̄-thang ī
閣再奕會無彩錢
koh-tsài ī ē bô-tshái tsînn
