媽媽毋免驚
《媽媽毋免驚》Má-mah M̄-bián Kiann
蔡秋鳳 Tshuà Tshiu-hōng
——————————————
看我學爬
khuànn guá o̍h pê
閣咧學行
koh-leh o̍h kiânn
圓滾滾的目睭
înn kún-kún ê ba̍k-tsiu
金金看
kim-kim-khuànn
半生的煩惱只為我
puànn-sing ê huân-ló tsí uī guá
幼軟的皮膚
iù-nńg ê phuê-hu
換來雙手的疤
uānn lâi siang-tshiú ê pa
少年的願望遮爾大
siàu-liân ê guān-bāng tsiah-nī tuā
生活離袂開鹹酸苦汫
sing-ua̍h lī buē khui kiâm-sng khóo-tsiánn
一生的愛交予我
it-sing ê ài kau hōo guá
只為一句一聲媽媽
tsí uī tsi̍t-kù tsi̍t-siann má-mah
思念親像一粒山
su-liām tshin-tshiūnn tsi̍t-lia̍p suann
夢猶未完成就老矣
bāng iáu-buē uân-sîng tiō lāu–ah
一身囝兒債藏佇心肝
it-sin kiánn-jî-tsè tshàng tī sim-kuann
頭殼內攏是你單純的笑聲
thâu-khak lāi lóng-sī lí tan-sûn ê tshiò-siann
思念親像一粒山
su-liām tshin-tshiūnn tsi̍t-lia̍p suann
猶未報答你的恩情就老矣
iáu-buē pò-tap lí ê un-tsîng tiō lāu–ah
等你有一工無法度行
tán lí ū-tsi̍t-kang bô-huat-tōo kiânn
我會踮你身邊
guá ē tiàm lí sin-pinn
做你的枴仔
tsò lí ê kuai-á
—
做你的乖囝
tsò lí ê kuai-kiánn