媽媽的目屎

by ·

《媽媽的目屎》Ma-ma ê Ba̍k-sái

蔡佳麟 TSHUÀ KA-LÎN
阿母講出門愛加疊衫
a-bú kóng tshut-mn̂g ài ke tha̍h sann
尤其是孤單拍拚在外
iû-kî sī koo-tuann phah-piànn tsāi-guā
莫袂記三頓愛按時食
mài buē-kì sann tǹg ài àn-sî tsia̍h
閣有冬天時棉被著蓋予厚
koh ū tang-thinn sî mî-phuē tio̍h kah hōo kāu
媽媽啊 你的話我有聽
ma-ma–ah lí ê uē guá ū thiann
毋甘你無人佮你做伴
m̄-kam lí bô lâng kah lí tsuè-phuānn
想起你做工課的身影
siūnn-khí lí tsò khang-khuè ê sin-iánn
我暫時用心共你攬牢
guá tsiām-sî iōng-sim kā lí lám tiâu
幾十年你辛苦共阮晟
kuí-tsa̍p nî lí sin-khóo kā gún tshiânn
儉腸凹肚為著予阮好命
khiām-tn̂g-neh-tōo uī-tio̍h hōo gún hó-miā
照著鏡袂記自己有偌美麗
tsiò-tio̍h kiànn buē-kì tsū-kí ū guā bí-lē
烏頭鬃已經賰無濟
oo thâu-tsang í-king tshun bô tsē
望你了解
bāng lí liáu-kái
了解咱離開你的無奈
liáu-kái lán lī-khui lí ê bô-nāi
你的恩情親像寬闊大海
lí ê un-tsîng tshin-tshiūnn khuan-khuah tuā-hái
遙遠的世界
iâu-uán ê sè-kài
阮猶未予你閣等待
gún á-buē hōo lí koh tán-thāi
望你會知
bāng lí ē tsai
知影阮拍拚為著未來
tsai-iánn gún phah-piànn uī-tio̍h bī-lâi
阮會帶著滿滿的愛倒轉來
gún ē tuà-tio̍h buán-buán ê ài tò-tńg–lâi
上天有安排
siong-thinn ū an-pâi
為你拭焦阮毋甘的目屎
uī lí tshit ta gún m̄-kam ê ba̍k-sái
阿母啊 離開你幾若冬
a-bú–ah lī-khui lí kuí-lō tang
今仔日 你的手我來牽
kin-á-li̍t lí ê tshiú guá lâi khan
你的笑容代替了思念
lí ê tshiò-iông tāi-thè liáu su-liām
我愛你 我心愛的媽媽
guá ài lí, guá sim-ài ê ma-ma
我愛你 我心愛的媽媽
guá ài lí, guá sim-ài ê ma-ma

You may also like...

Skip to toolbar