阿媽的白頭鬃
《阿媽的白頭鬃》A-má ê Pe̍h-thâu-tsang
潘麗麗 Phuann Lē-lē
——————————————
清朝出世
Tshing-tiâu tshut-sì
日據嫁翁
Ji̍t-kì kè-ang
如今守寡幾若十冬
jû-kim tsiúnn-kuánn kuí-lō tsa̍p tang
改朝換代遐濟款
kái-tiâu uānn-tāi hiah tsē khuán
攏是查埔揣麻煩
lóng-sī tsa-pōo tshuē mâ-huân
阮的阿媽啥人管
gún ê a-má siánn-lâng kuán
孤單一个查某人
koo-tuann tsi̍t-ê tsa-bóo-lâng
阿媽的白頭鬃
a-má ê pe̍h-thâu-tsang
教阮清白在人間
kà gún tshing-pi̍k tsāi jîn-kan
阿媽的白頭鬃
a-má ê pe̍h-thâu-tsang
輕輕縛著伊的夢
khin-khin pa̍k tio̍h i ê bāng
清朝出世
Tshing-tiâu tshut-sì
日據嫁翁
Ji̍t-kì kè-ang
如今守寡幾若十冬
jû-kim tsiúnn-kuánn kuí-lō tsa̍p tang
教囝飼孫規世人
kà-kiánn tshì-sun kui-sì-lâng
拖磨性命強欲空
thua-buâ sìnn-miā kiōng-beh khang
心中只有一个夢
sim-tiong tsí-ū tsi̍t-ê bāng
囝孫大漢會輕鬆
kiánn-sun tuā-hàn ē khin-sang
阿媽的白頭鬃
a-má ê pe̍h-thâu-tsang
教阮清白在人間
kà gún tshing-pi̍k tsāi jîn-kan
阿媽的白頭鬃
a-má ê pe̍h-thâu-tsang
輕輕縛著伊的夢
khin-khin pa̍k tio̍h i ê bāng
