冬節圓
《冬節圓》Tang-tseh-înn
潘麗麗 Phuann Lē-lē
——————————————
小雪過了是大雪
sió-seh kuè-liáu sī tuā-seh
大雪閣行到冬節
tuā-seh koh kiânn kàu tang-tseh
暗暝上蓋長
àm-mî siōng-kài tn̂g
思念遠遠遠
su-liām hn̋g-hn̄g-hn̄g
今年操煩夢中囥
kin-nî tshau-huân bāng-tiong khǹg
醒來日頭曝眠床
tshínn–lâi ji̍t-thâu pha̍k bîn-tshn̂g
圓仔思念來煮湯
înn-á su-liām lâi tsú-thng
一碗親情燒閣軟
tsi̍t-uánn tshin-tsîng sio koh nńg
冬節寒霜來叫門
tang-tseh hân-song lâi kiò-mn̂g
叫咱明年早拍算
kiò lán mê-nî tsá phah-sǹg
過去毋免問
kuè-khì m̄-bián mn̄g
未來咧發光
bī-lâi leh huat-kng
仝心早慢會相見
kāng-sim tsá-bān ē sann-kìnn
拍開彩霞半邊天
phah-khui tshái-hâ puànn-pinn thinn
冬節圓仔逐粒圓
tang-tseh înn-á ta̍k-lia̍p înn
明年定著是好年
mê-nî tiānn-tio̍h sī hó nî
