食酒人
《食酒人》Tsia̍h-tsiú-lâng
劉福助 Lâu Hok-tsōo
——————————————
食酒的人
tsia̍h-tsiú ê lâng
無啉燒酒咇咇掣
bô lim sio-tsiú phi̍h-phi̍h-tshuah
拄著燒酒是啉袂煞
tú-tio̍h sio-tsiú sī lim buē suah
無啉人戇戇
bô lim lâng gōng-gōng
酒啉人悾悾
tsiú lim lâng khong-khong
講話煞大舌
kóng-uē suah tuā-tsi̍h
又閣直直喋
iū-koh ti̍t-ti̍t thi̍h
目睭煞起花
ba̍k-tsiu suah khí-hue
行路直欲飛
kiânn-lōo ti̍t beh pue
匏仔看做是菜瓜
pû-á khuànn-tsò sī tshài-kue
行路跤軟軟
kiânn-lōo kha nńg-nńg
厝內袂曉轉
tshù-lāi bē-hiáu tńg
倒咧半路睏
tó teh puànn-lōo khùn
寒甲爍爍顫
kuânn kah sih-sih-tsùn
有的倒咧大廳頭
ū-ê tó teh tuā thiann-thâu
有的酒醉若著猴
ū-ê tsiú-tsuì ná tio̍h-kâu
有的酒醉目微微
ū-ê tsiú-tsuì ba̍k bui-bui
看著朋友喙開開
khuànn-tio̍h pîng-iú tshuì khui-khui
酒醉講話煞落風
tsiú-tsuì kóng-uē suah làu-hong
老爸看做是阿公
lāu-pē khuànn-tsò sī a-kong
有的酒醉抱塗沙
ū-ê tsiú-tsuì phō thôo-sua
駛彼號牛車來共拖
sái hit-lō gû-tshia lâi kā thua
有的艱苦一直吐
ū-ê kan-khóo it-ti̍t thòo
朋友規陣來照顧
pîng-iú kui-tīn lâi tsiàu-kòo
酒醉浮浮跤輕輕
tsiú-tsuì phû-phû kha khin-khin
喙瀾水是㴙㴙津
tshuì-nuā-tsuí sī tsha̍p-tsha̍p tin
酒醉囉嗦厚話屎
tsiú-tsuì lo-so kāu-uē-sái
一句話講幾若擺
tsi̍t-kù uē kóng kuí-lō pái
燒酒是啉甲空空空
sio-tsiú sī lim kah kha̋ng-khang-khang
講話目睭煞挩窗
kóng-uē ba̍k-tsiu suah thuah-thang
有的酒醉真?花
ū-ê tsiú-tsuì tsin gâu hue
酒醉的亂著較袂衰
tsiú-tsuì–ê luān-tio̍h khah bē sue
有的酒醉真?挐
ū-ê tsiú-tsuì tsin gâu jû
一个歁歁若像牛
tsi̍t-ê khám-khám ná-tshiūnn gû
有的酒醉會起狂
ū-ê tsiú-tsuì ē khí-kông
相拍輾挵硞硞傱
sio-phah lìn-lòng kho̍k-kho̍k tsông
有的酒醉真正猛
ū-ê tsiú-tsuì tsin-tsiànn bíng
椅仔桌仔閣亂亂反
í-á toh-á koh luān-luān píng
有的酒醉失理智
ū-ê tsiú-tsuì sit lí-tì
亂做代誌閣直直去
luān tsò tāi-tsì koh ti̍t-ti̍t khì
後果實在愛考慮
hiō-kó si̍t-tsāi ài khó-lī
拄著一擺就袂飼
tú-tio̍h tsi̍t-pái tiō bē tshī
啉酒盡量是毋通激
lim-tsiú tsīn-liōng sī m̄-thang kik
強激啉酒是面綠色
kiông kik lim-tsiú sī bīn li̍k-sik
啉予伊爽爽是較拄好
lim hōo i sóng-sóng sī khah tú-hó
酒醉艱苦是會煩惱
tsiú-tsuì kan-khóo sī ē huân-ló
兄弟朋友咧?迌
hiann-tī pîng-iú teh thit-thô
最後添杯不如無
tsuè-āu thiam pue put-jû bô
