行行出狀元
《行行出狀元》Hâng-hâng Tshut Tsiōng-guân
劉福助 Lâu Hok-tsōo
——————————————
近來的事業滿滿是
kīn-lâi ê sū-gia̍p muá-muá-sī
人人心肝攏想趁錢
lâng-lâng sim-kuann lóng siūnn thàn-tsînn
工業社會逐家?反變
kang-gia̍p siā-huē ta̍k-ke gâu píng-pìnn
目睭擘金就想趁錢
ba̍k-tsiu peh-kim tiō siūnn thàn-tsînn
我的祖公仔徛唐山
guá ê tsóo-kong-á khiā Tn̂g-suann
過來臺灣燒火炭
kuè-lâi Tâi-uân sio hué-thuànn
嘛咧鶯歌燒碗盤
mā teh Ing-ko sio uánn-puânn
了後改咧賣豆乾
liáu-āu kái teh bē tāu-kuann
豆乾毋食食豆腐
tāu-kuann m̄ tsia̍h tsia̍h tāu-hū
家己食倒煞咧夆倩看牛
ka-kī tsia̍h tó suah teh hông tshiànn khuànn-gû
現在佇咧市政府
hiān-tsāi tī-leh tshī-tshìng-hú
咧做大官辦公事
teh tsuè tuā-kuann pān kong-sū
若欲講起阮外公
nā beh kóng-khí gún guā-kong
出名童乩亂亂傱
tshut-miâ tâng-ki luān-luān tsông
傱一下傷雄半小死
tsông tsi̍t-ē siunn hiông puànn-sió-sí
事後改咧牽尪姨
sū-āu kái teh khan-ang-î
嘛有咧做布袋戲
mā ū teh tsuè pòo-tē-hì
順紲兼咧做西醫
sūn-suà kiam teh tsuè se-i
透早佇咧賣豆奶
thàu-tsá tī-teh bē tāu-ni
暗時佇夜市仔賣大麵
àm-sî tī iā-tshī-á bē tuā-mī
大廳開店補喙齒
tuā-thiann khui-tiàm póo tshuì-khí
厝後佇咧飼大豬
tshù-āu tī-teh tshī tuā-ti
飼大豬大趁錢
tshī tuā-ti tuā thàn-tsînn
發達現在佇咧賣番薯
huat-ta̍t hiān-tsāi tī-teh bē han-tsî
上蓋骨力阮外媽
siōng-kài kut-la̍t gún guā-má
伊佇咧城內賣仙楂
i tī-teh siânn-lāi bē sian-tsa
嘛有咧賣米粉炒
mā ū teh bē bí-hún-tshá
嘛有佇咧炕猴膠
mā ū tī-teh khòng kâu-ka
大囝佇鐵路部食頭路
tuā-kiánn tī thih-lōo-pōo tsia̍h-thâu-lōo
修理火車面烏烏
siu-lí hué-tshia bīn oo-oo
了後升咧機關庫
liáu-āu sing teh ki-kuan-khòo
專門佇咧顧火爐
tsuan-bûn tī-teh kòo hué-lôo
細漢的電台食頭路
sè-hàn–ê tiān-tâi tsia̍h-thâu-lōo
咧講司機聽友俱樂部
teh kòo su-ki thiann-iú khū-lo̍k-pōo
兼咧拜神賣香爐
kiam teh pài-sîn bē hiunn-lôo
專門佇咧賣尼姑
tsuan-bûn tī-teh bē nî-koo
後生上濟是阮叔公
hāu-sinn siōng tsē sī gún tsik-kong
佇咧內山做番王
tī-teh lāi-suann tsuè huan-ông
大叔仔佇咧賣水雞
tuā-tsik–á tī-teh bē tsuí-ke
二叔仔佇咧抾田螺
jī-tsik–á tī-teh khioh tshân-lê
三叔仔佇咧做塗水
sann-tsik–á tī-teh tsò thôo-tsuí
四叔仔會曉看風水
sì-tsik–á ē-hiáu khuànn hong-suí
五叔仔佇咧歕雞胿
gōo-tsik–á tī-teh pûn-ke-kui
六叔仔專門咧舀肥
la̍k-tsik–á tsuan-bûn teh iúnn-puî
七叔仔佇咧顧墓仔埔
tshit-tsik–á tī-teh kòo bōng-á-poo
八叔仔佇咧賣麵線糊
peh-tsik–á tī-teh bē mī-suànn-kôo
九叔仔佇咧賣酸醋
káu-tsik–á tī-teh bē sng-tshòo
屘叔仔欠錢咧走路
ban-tsik–á khiàm-tsînn teh tsáu-lōo
大姑佇咧賣麻糍
tuā-koo tī-teh bē muâ-tsî
二姑仔五金拍鎖匙
jī-koo–á ngóo-kim phah só-sî
三姑仔雜貨賣白米
sann-koo–á tsa̍p-huè bē pe̍h-bí
四姑仔掠龍歕咑呧
sì-koo–á lia̍h-lîng pûn tā-ti
五姑仔電氣賣電視
gōo-koo–á tiān-khì bē tiān-sī
六姑仔市場賣鹹魚
la̍k-koo–á tshī-tiûnn bē kiâm-hî
七姑仔粗勇咧做苦力
tshit-koo–á tshoo-ióng teh tsò ku-lí
八姑仔怹厝佇咧車螺絲
peh-koo–á in tshù ti̍h tshia lôo-si
九姑仔佇咧賣雞卷
káu-koo–á tī-teh bē ke-kńg
十姑仔佇咧賣圓仔湯
tsa̍p-koo–á tī-teh bē înn-á-thng
十一咧賣滷肉飯
tsa̍p-it teh bē lóo-bah-pn̄g
屘姑仔佇咧變猴爽
ban-koo–á tī-teh pìnn kâu-sńg
上蓋有錢是阮阿伯
siōng-kài ū-tsînn sī gún a-peh
日時開店刺皮鞋
ji̍t–sî khui-tiàm tshiah phuê-ê
暗時佇咧掠水雞
àm-sî tī-teh lia̍h tsuí-ke
嘛有咧做霆水螺
mā ū teh tsò tân-tsuí-lê
姆婆仔咧賣碗糕粿
ḿ-pô–á teh bē uánn-ko-kué
怹大囝咧酒店歕鼓吹
in tuā-kiánn teh tsiú-tiàm pûn kóo-tshue
二囝咧做番仔火
jī-kiánn teh tsò huan-á-hué
上細出名是姼仔詼
siōng-sè tshut-miâ sī tshit-á-khue
世界頭路是萬百款
sè-kài thâu-lōo sī bān-pah khuán
安份守己頭一層
an-hūn-siú-kí thâu tsi̍t tsân
毋通這山看彼山懸
m̄-thang tsit suann khuànn hit suann kuân
拍拚行行出狀元
phah-piànn hâng-hâng tshut tsiōng-guân
行行出狀元
hâng-hâng tshut tsiōng-guân
