平安燈
《平安燈》Pîng-an-ting
潘佩莉Phuann Puē-lī
——————————————
秋風冷冷
tshiu-hong líng-líng
異鄉的夜暗暝
ī-hiong ê iā àm-mî
想起厝內大大細細的代誌
siūnn-khí tshù-lāi tuā-tuā-sè-sè ê tāi-tsì
阿爸阿母
a-pah a-bú
請恁免掛意
tshiánn lín bián kuà-ì
請恁好好照顧家己
tshiánn lín hó-hó tsiàu-kòo ka-tī
阿母你寄予阮的平安符
a-bú lí kià hōo gún ê pîng-an-hû
阮攏一直一直紮佇身邊
gún lóng it-ti̍t it-ti̍t tsah tī sin-pinn
想恁的時陣
siūnn lín ê sî-tsūn
就會望向天星
tiō ē bāng hiòng thinn-tshinn
對恁的思念
tuì lín ê su-liām
藏佇月圓
tshàng tī gue̍h-înn
為恁祈求的平安燈
uī lín kî-kiû ê pîng-an-ting
會當予恁
ē-tàng hōo lín
健康四序一生
kiān-khong sù-sī it-sing
雖然阮無佇恁的身邊
sui-jiân gún bô tī lín ê sin-pinn
心會永遠永遠
sim ē íng-uán íng-uán
佮恁相依
kah lín siong-i
飛向天邊的平安燈
pue hiòng thinn-pinn ê pîng-an-ting
引起著阮想厝的心情
ín-khí tio̍h gún siūnn-tshù ê sim-tsîng
若是回鄉的彼一時
nā-sī huê-hiong ê hit tsi̍t-sî
阮欲講出
gún beh kóng-tshut
阿爸阿母
a-pah a-bú
阮上愛恁
gún siōng ài lín
