翁親某親老公婆仔拋捙輪
《翁親某親老公婆仔拋捙輪》
Ang Tshin Bóo Tshin Lāu-kong-pô-á Pha-tshia-lin
劉福助Lâu Hok-tsōo
——————————————
少年痟娶某 || siàu-liân siáu tshuā-bóo
哎唷~無某真艱苦 || aih-iooh~ bô bóo tsin kan-khóo
凊凊彩彩娶一个某 || tshìn-tshìn-tshái-tshái tshuā tsi̍t-ê bóo
人講一个某 || lâng kóng tsi̍t-ê bóo
較好三个天公祖 || khah hó sann ê Thinn-kong-tsóo
哎唷~愛某媠 || aih-iooh~ ài bóo suí
共某捀面桶水 || kā bóo phâng bīn-tháng-tsuí
愛某白 || ài bóo pe̍h
共某洗跤腿 || kā bóo sé kha-thuí
人講驚某大丈夫 || lâng kóng kiann-bóo tāi-tiōng-hu
拍某是豬狗牛 || phah-bóo sī ti káu gû
聽某喙會大富貴 || thiann bóo tshuì ē tuā hù-kuì
看某媠 || khuànn bóo suí
無酒嘛天天醉 || bô tsiú mā thian-thian tsuì
愛某驚某苦 || ài bóo kiann bóo khóo
三頓雞鴨共某補 || sann tǹg ke-ah kā bóo póo
毋驚老母勞 || m̄-kiann lāu-bú lô
放老母做老婆 || pàng lāu-bú tsuè lāu-pô
哎唷~翁親某親 || aih-iooh~ ang tshin bóo tshin
是公婆仔拋捙輪 || sī kong-pô-á pha-tshia-lin
人講飼某無論飯 || lâng kóng tshī bóo bô lūn pn̄g
飼爸母著算頓 || tshī pē-bú tio̍h sǹg tǹg
好魚好肉是捀去囥 || hó hî hó bah sī phâng khì khǹg
菜脯根仔來罔過頓 || tshài-póo-kin-á lâi bóng kuè tǹg
飼某飼甲肥朒朒 || tshī bóo tshī kah puî-tsut-tsut
飼爸母飼甲賰一枝骨 || tshī pē-bú tshī kah tshun tsi̍t-ki kut
毋通細漢爸母生 || m̄-thang sè-hàn pē-bú sinn
大漢變某生 || tuā-hàn piàn bóo sinn
毋通細漢母仔囝 || m̄-thang sè-hàn bú-á-kiánn
大漢變成某的囝 || tuā-hàn piàn-sîng bóo ê kiánn
我勸懵懂少年家 || guá khǹg bóng-tóng siàu-liân-ke
至親爸母是咱的 || tsì-tshin pē-bú sī lán–ê
翁親某親 || ang tshin bóo tshin
是爸母應該閣較親 || sī pē-bú ing-kai koh-khah tshin
毋通放老公婆仔 || m̄-thang pàng lāu-kong-pô–á
咧拋捙輪 || teh pha-tshia-lin
