破碎的勃露斯
《破碎的勃露斯》Phò-tshuì ê Bu-lù-suh
趙千香Tiō Tshian-hiong
——————————————
為何阮的命運
uī-hô gún ê miā-ūn
變成遮悲哀
piàn-sîng tsiah pi-ai
欲吼又閣無目屎
bueh háu iū-koh bô ba̍k-sái
怨恨伊的假愛
uàn-hūn i ê ké-ài
枉費阮等待
óng-huì gún tán-thāi
無帶念咱的約束
bô tài-liām lán ê iok-sok
實在不應該
si̍t-tsāi put-ing-kai
啊~啥人會來了解
ah~ siánn-lâng ē lâi liáu-kái
啥人會知
siánn-lâng ē tsai
已經破碎勃露斯
í-king phuà-tshuì bu-lù-suh
為何目前時常
uī-hô ba̍k-tsîng sî-siông
浮出你形影
phû-tshut lí hîng-iánn
害阮每日無心情
hāi gún muí-ji̍t bô-sim-tsiânn
引起阮心痛疼
ín-khí gún sim thàng-thiànn
面黃流凊汗
bīn n̂g lâu tshìn-kuānn
咱美夢變成空夢
lán bí-bāng piàn-sîng khang-bāng
如今才知影
jû-kim tsiah tsai-iánn
啊~貪金錢定親情
ah~ tham kim-tsînn tīng tshin-tsiânn
使人可驚
sú-lâng khó-kiann
已經破碎勃露斯
í-king phuà-tshuì bu-lù-suh
為何耽誤青春
uī-hô tam-gōo tshing-tshun
敢是為著你
kám-sī uī-tio̍h lí
每日徘徊夜都市
muí-ji̍t pâi-huê iā too-tshī
阮身邊若無你
gún sin-pinn nā bô lí
生活無意義
sing-ua̍h bô ì-gī
只有是吉他做伴
tsí-ū sī gì-tah tsuè-phuānn
唱出斷腸詩
tshiùnn-tshut tuān-tn̂g si
啊~無聊的流浪兒
ah~ bô-liâu ê liû-lōng-jî
流浪天邊
liû-lōng thinn-pinn
已經破碎勃露斯
í-king phuà-tshuì bu-lù-suh
