無伴的下班了後
《無伴的下班了後》Bô-phuānn ê Hā-pan Liáu-āu
鳳琴Hōng-khîm
——————————————
揣無伴的下班了後
tshuē-bô phuānn ê hā-pan liáu-āu
招人踅街四界走
tsio lâng se̍h-ke sì-kè tsáu
啉酒唱歌
lim-tsiú tshiùnn-kua
毋驚吵鬧
m̄-kiann tsháu-nāu
上驚轉到厝
siōng kiann tńg kàu tshù
無人等候
bô-lâng tán-hāu
揣無伴的下班了後
tshuē-bô phuānn ê hā-pan liáu-āu
練Yoga
liān Yoga
驚身材綴年歲走
kiann sin-tsâi tuè nî-huè tsáu
看悲情的劇
khuànn pi-tsîng ê kio̍k
綴咧哭
tuè teh khàu
安慰阮的人
an-uì gún ê lâng
欲等何時才會到
beh tán hô-sî tsiah ē kàu
嗯~毋願目睭金金
ngh~ m̄-guān ba̍k-tsiu kim-kim
看青春放水流
khuànn tshing-tshun pàng tsuí lâu
總是等下班了後
tsóng-sī tán hā-pan liáu-āu
揣代誌
tshuē tāi-tsì
將空虛趕走
tsiong khang-hi kuánn-tsáu
怨嘆時間無慈悲
uàn-thàn sî-kan bô tsû-pi
將阮的青春歲月偷
tsiong gún ê tshing-tshun suè-gua̍t thau
無伴的下班了後
bô-phuānn ê hā-pan liáu-āu
心嘛漸漸仔老
sim mā tsiām-tsiām-á lāu
