阿公的話
《阿公的話》A-kong ê Uē
梁一凡Niû It-huân(梁東男Niû Tong-lâm )
——————————————
阿公伊上疼我啊
a-kong i siōng thiànn guá–ah
定定?阮四界行
tiānn-tiānn tshuā gún sì-kè kiânn
有時就去戲棚跤
ū-sî tiō khì hì-pênn-kha
有時就去廟口埕
ū-sî tiō khì biō-kháu-tiânn
見擺伊若食飯飽
kiàn-pái i nā tsia̍h-pn̄g pá
就散步閣那唸歌
tiō sàn-pōo koh ná liām-kua
有時?阮去田岸
ū-sî tshuā gún khì tshân-huānn
有時?阮去後山
ū-sî tshuā gún khì āu-suann
伊講戇人天公疼
i kóng gōng-lâng thinn-kong thiànn
捙跋反是無較縒
tshia-pua̍h-píng sī bô-khah-tsua̍h
人著毋通傷虛華
lâng tio̍h m̄-thang siunn hi-hua
夢著毋通做傷大
bāng tio̍h m̄-thang tsuè siunn tuā
阿公雖然無讀冊
a-kong sui-jiân bô tha̍k-tsheh
但是教我捌足濟
tān-sī kà guá bat tsiok tsuē
阿公雖然話無濟
a-kong sui-jiân uē bô tsē
逐句我攏有聽落
ta̍k-kù guá lóng ū thiann–lueh
伊講食緊就挵破碗
i kóng tsia̍h-kín tiō lòng-phuà uánn
心頭著愛掠予定
sim-thâu tio̍h-ài lia̍h hōo tiānn
人著毋通傷勥跤
lâng tio̍h m̄-thang siunn khiàng-kha
路著愛穩穩仔行
lōo tio̍h-ài ún-ún-á kiânn
阿公雖然無佇咧
a-kong sui-jiân bô tī–leh
但是我閣會記得
tān-sī guá koh ē-kì-eh
阿公共我講的話
a-kong kā guá kóng ê uē
我攏會閣共傳落
guá lóng ē koh kā thuân–lueh
