乖乖仔做工課
《乖乖仔做工課》Kuai-kuai-á Tsuè Khang-khuè
梁一凡Niû It-huân(梁東男Niû Tong-lâm )
——————————————
人生行到這个坎站
jîn-sing kiânn kàu tsit ê khám-tsām
規个人有淡薄仔忝
kui-ê lâng ū tām-po̍h-á thiám
拚死拚活
piànn-sí piànn-ua̍h
錢嘛是遐歹趁
tsînn mā sī hiah pháinn thàn
敢是我這个人
kám-sī guá tsit ê lâng
傷頇顢
siunn han-bān
現實的社會
hiān-si̍t ê siā-huē
看懸無看低
khuànn kuân bô khuànn kē
翼股頭仔無夠硬
si̍t-kóo-thâu–á bô-kàu ngē
是欲按怎飛
sī beh án-tsuánn pue
燒酒一杯閣一杯
sio-tsiú tsi̍t-pue koh tsi̍t-pue
啉予伊馬西馬西
lim hōo i má-se-má-se
成功的機會
sîng-kong ê ki-huē
攏咧佮我覕相揣
lóng teh kah guá bih-sio-tshuē
前途哪會遮爾烏暗
tsiân-tôo ná ē tsiah-nī oo-àm
日子有淡薄仔困難
ji̍t-tsí ū tām-po̍h-á khùn-lân
骨力加班
kut-la̍t ka-pan
橐袋仔嘛空空
lak-tē-á mā khang-khang
敢講我
kám-kóng guá
一世人攏遮散
tsi̍t-sì-lâng lóng tsiah sàn
無情的社會
bô-tsîng ê siā-huē
看懸無看低
khuànn kuân bô khuànn kē
翼股頭仔無夠硬
si̍t-kóo-thâu–á bô-kàu ngē
是欲按怎飛
sī beh án-tsuánn pue
頭路毋是蓋好揣
thâu-lōo m̄-sī kài hó tshuē
有著先罔做罔做
ū tio̍h sing bóng-tsuè bóng-tsuè
明仔載嘛是
bîn-á-tsài mā sī
愛乖乖仔做工課
ài kuai-kuai-á tsuè khang-khuè
囡仔猶閣咧讀冊
gín-á iáu-koh teh tha̍k-tsheh
所費愛閣開誠濟
sóo-huì ài koh khai tsiânn tsē
明仔載嘛是
bîn-á-tsài mā sī
愛乖乖仔做工課
ài kuai-kuai-á tsuè khang-khuè
薪水雖然無偌濟
sin-suí sui-jiân bô guā-tsē
加減會當補一下
ke-kiám ē-tàng póo–tsi̍t-ē
明仔載嘛是
bîn-á-tsài mā sī
愛乖乖仔做工課
ài kuai-kuai-á tsuè khang-khuè
燒酒毋通啉傷濟
sio-tsiú m̄-thang lim siunn tsē
有啉就好
ū lim tiō hó
莫超過
mài tshiau-kuè
明仔載嘛是
bîn-á-tsài mā sī
愛乖乖仔做工課
ài kuai-kuai-á tsuè khang-khuè
拚甲頭毛喙鬚白
piànn kah thâu-mn̂g tshuì-tshiu pe̍h
成功當時是我的
sîng-kong tang-sî sī guá ê
明仔載嘛是
bîn-á-tsài mā sī
愛乖乖仔做工課
ài kuai-kuai-á tsuè khang-khuè
樂透來去加減買
lètòu lâi-khì ke-kiám bé
凡勢頭獎是我的
huān-sè thâu-tsióng sī guá ê
明仔載就會使
bîn-á-tsài tiō ē-sái
免閣去做工課
bián koh khì tsuè khang-khuè
明仔載就會使
bîn-á-tsài tiō ē-sái
爽爽仔涼涼仔過
sóng-sóng-á liâng-liâng-á kuè
↓—(口白)—↓
莫閣佇遐練痟話
mài koh tī hia liān-siáu-uē
酒杯仔趕緊收收咧
tsiú-pue-á kuánn-kín siu-siu–leh
明仔載嘛是
bîn-á-tsài mā sī
愛乖乖仔做工課
ài kuai-kuai-á tsò khang-khuè
