花開思春
《花開思春》Hue Khui Su Tshun
李清風Lí Tshing-hong
——————————————
親親伊人好花欉
tshin-tshin i-jîn hó hue-tsâng
予阮想著初戀夢
hōo gún siūnn-tio̍h tshoo-luân bāng
看牡丹
khuànn bóo-tan
想你一人
siūnn lí tsi̍t-lâng
少女心情像花芳
siàu-lú sim-tsîng tshiūnn hue-phang
牡丹花開
bóo-tan-hue khui
牡丹若開放上紅
bóo-tan nā khui hòng siōng âng
一片熱情花相送
tsi̍t-phìnn jia̍t-tsîng hue sio-sàng
欲送彼个人
bueh sàng hit ê lâng
涼風笑阮無芳味
liâng-hong tshiò gún bô phang-bī
予阮愈想愈哀悲
hōo gún jú siūnn jú ai-pi
青春夢無疑走去
tshing-tshun bāng bô-gî tsáu–khì
心肝愈想愈驚疑
sim-kuann jú siūnn jú kiann-gî
牡丹開透
bóo-tan khui-thàu
牡丹開透無聲息
bóo-tan khui-thàu bô siann-sit
一片熱情花相送
tsi̍t-phiàn jia̍t-tsîng hue sio-sàng
欲送彼人伊
bueh sàng hit lâng i
伊是紅色的牡丹
i sī âng-sik ê bóo-tan
阮是白色的牡丹
gún sī pe̍h-sik ê bóo-tan
暝日想伊在小窗
mî-ji̍t siūnn i tsāi sió-thang
何時會得通結成雙
hô-sî ē-tit thang kiat-sîng sang
牡丹若謝
bóo-tan nā siā
牡丹若謝無希望
bóo-tan nā siā bô hi-bāng
一片熱情花相送
tsi̍t-phìnn jia̍t-tsîng hue sio-sàng
欲送彼个人
bueh sàng hit ê lâng
