添丁發大財
《添丁發大財》Thiam-ting Huat Tuā-tsâi
尤君Iû Kun
——————————————
新年新春日日春
sin-nî sin-tshun ji̍t-ji̍t tshun
堂前膝下滿囝孫
tông-tsiân tshik-hā muá kiánn-sun
吉時吉日報春福
kiat-sî kiat-ji̍t pò tshun-hok
添丁添壽好過年
thiam-ting thiam-siū hó kuè-nî
新正結新綵
sin-tsiann kiat sin tshái
和氣由天來
hô-khì iû thian lâi
鑼鼓鬧啋啋
lô-kóo nāu-tshái-tshái
添丁大發財
thiam-ting tuā huat-tsâi
–
春天的頭一日
tshun-thinn ê thâu tsi̍t-ji̍t
就是咱好過年
tsiū-sī lán hó kè-nî
家家戶戶迎新年
ke-ke-hōo-hōo ngiâ sin-nî
男女老幼笑微微
lâm-lú nóo-iù tshiò-bi-bi
田庄的老兄哥
tshân-tsng ê lāu hiann-ko
喙咬薰吹頭敧敧
tshuì kā hun-tshe thâu khi-khi
看著人就鞠躬
khuànn-tio̍h lâng tsiū kiok-kiong
逐家恭喜大趁錢
ta̍k-ke kiong-hí tuā thàn-tsînn
桃花紅桃花紅
thô-hue âng thô-hue âng
寶島的好過年
pó-tó ê hó kè-nî
春風吹來花清芳
tshun-hong tshue lâi hue tshing-phang
鼻著心情齊輕鬆
phīnn-tio̍h sim-tsîng tsiâu khin-sang
都市的老兄哥
too-tshī ê lāu-hiann-ko
跤手敏捷真活動
kha-tshiú bín-tsia̍p tsin ua̍h-tāng
見著人就開喙
kìnn-tio̍h lâng tsiū khui-tshuì
祝你富貴由天送
tsiok lí hù-kuì iû thian sàng
人人知人人知
lâng-lâng tsai lâng-lâng tsai
過新年結新綵
kè sin-nî kiat sin tshái
鑼鼓炮聲鬧啋啋
lô-kóo phàu siann nāu-tshái-tshái
大大細細笑咍咍
tuā-tuā-suè-suè tshiò-hai-hai
內山的老兄哥
lāi-suann ê lāu hiann-ko
笑甲喙仔裂西西
tshiò kah tshuì-á li̍h-sai-sai
看著人就講著
khuànn-tio̍h lâng tsiū kóng-tio̍h
添丁大發財
thiam-ting tuā huat-tsâi
