離愁小調
《離愁小調》Lî-tshiû Sió-tiāu
董英明Táng Ing-bîng
陳芬蘭Tân Hun-lân
——————————————
每日思念伊啦啦啦
muí-ji̍t su-liām i lah-lah-lah
每日思念伊啦啦啦
muí-ji̍t su-liām i lah-lah-lah
每日思念伊
muí-ji̍t su-liām i
故鄉的心愛的人
kòo-hiong ê sim-ài ê lâng
怎樣過日子
tsuánn-iūnn kè ji̍t-tsí
完成著希望
uân-sîng tio̍h hi-bōng
一家團團圓
tsit-ke thuân-thuân-înn
到底等何時
tàu-té tán hô-sî
異鄉的黃昏日頭
ī-hiong ê hông-hun ji̍t-thâu
怨嘆墜落去
uàn-thàn tuī–lo̍h-khì
踮在樓窗邊啦啦啦
tiàm-tsāi lâu-thang pinn lah-lah-lah
踮在樓窗邊啦啦啦
tiàm-tsāi lâu-thang pinn lah-lah-lah
踮在樓窗邊
tiàm-tsāi lâu-thang pinn
看一張伊寄轉來
khuànn tsi̍t-tiunn i kià–tńg-lâi
可愛的相片
khó-ài ê siòng-phìnn
雖然笑嘻嘻
sui-jiân tshiò hi-hi
含帶情意甜
hâm-tài tsîng-ì tinn
阮怎心傷悲
gún tsuánn sim siong-pi
窗外的深更月眉
thang-guā ê tshim-kinn ge̍h-bâi
暗淡無活氣
àm-tām bô ua̍h-khì
秋風冷吱吱啦啦啦
tshiu-hong líng-ki-ki lah-lah-lah
秋風冷吱吱啦啦啦
tshiu-hong líng-ki-ki lah-lah-lah
秋風冷吱吱
tshiu-hong líng-ki-ki
看天邊一隻鳥仔
khuànn thinn-pinn tsi̍t-tsiah tsiáu-á
拚命飛過去
piànn-miā pue–kè-khì
伊也一定是
i iā it-tīng sī
誠心期待著
sîng-sim kî-thāi tio̍h
快樂的優美
khuài-lo̍k ê iu-bí
引起阮見景傷情
ín-khí gún kiàn-kíng siong-tsîng
不覺珠淚滴
put-kak tsu-luī tih
滿山草葉青啦啦啦
muá-suann tsháu-hio̍h tshinn lah-lah-lah
滿山草葉青啦啦啦
muá-suann tsháu-hio̍h tshinn lah-lah-lah
滿山草葉青
muá-suann tsháu-hio̍h tshinn
春天的百花
tshun-thinn ê pah-hue
已經獻出好芳味
í-king hiàn-tshut hó phang-bī
春風若有心
tshun-hong nā ū-sim
替阮來安排
thuè gún lâi an-pâi
一定揣著伊
it-tīng tshuē-tio̍h i
早轉來阮的身邊
tsá tńg-lâi gún ê sin-pinn
回復好情意
huê-ho̍k hó tsîng-ì
