1929
《1929》It Kiú Jī Kiú Nî
楊肅浩Iûnn Siok-hō
———————————————–
1929年
It kiú jī kiú nî
伊佇南京的庄跤出世
I tī Lâm-kiann ê tsng-kha tshut-sì
細漢的時定定捾著行李
sè-hàn ê sî tiānn-tiānn kuānn tio̍h hîng-lí
流浪到幾个完全生份的城市
liû-lōng kàu kuí ê uân-tsuân senn-hūn ê siânn-tshī
1949年
It kiú sù kiú nî
故鄉開滿紅色的花蕊
kòo-hiong khui buán âng-sik ê hue-luí
借問兵仔兄這馬欲去佗位
tsioh-mn̄g ping-á hiann tsit-má beh khì tó-uī
一隻船往基隆港一直開
tsi̍t tsiah tsûn óng Ke-lâng káng it-ti̍t khui
戰亂 分離 命運創治
tsiàn-luān hun-lî miā-ūn tshòng-tī
毋知影離開了後當時通轉去
m̄-tsai-iánn lī-khui liáu-āu tang-sî thang tńg–khì
越頭目睭一?就是三十年
ua̍t-thâu ba̍k-tsiu tsi̍t-nih tiō sī sann tsa̍p nî
啊 故鄉是淺淺的海水
ah kòo-hiong sī tshián tshián ê hái-tsuí
較?泅水嘛泅袂轉去
khah gâu siû-tsuí mā siû buē tńg–khì
生活過一个閣一个生份的城市
sing-ua̍h kuè tsit ê koh tsi̍t êsenn-hūn ê siânn-tshī
尾仔蹛佇用南京號名的路頂
bué-á tuà tī iōng Lâm-kiann hō-miâ ê lōo tíng
啊 故鄉是淺淺的海水
ah kòo-hiong sī tshián tshián ê hái-tsuí
偌濟思念攏停佇港邊
guā tsē su-liām lóng thîng tī káng pinn
滿山遍野的管芒花直直開
muá-suann phiàn iá êkuann-bâng-hue ti̍t-ti̍t khui
仝款的春天到秋天
kāng-khuánn êtshun-thinn kàu tshiu-thinn
一年過一年
tsi̍t nî kuè tsi̍t nî
1979年
It kiú tshit kiú nî
對香港轉來幾張批信
tuì Hiong-káng tsuán-lâi kuí tiunn phue-sìn
內底有伊細漢學行的相片
lāi-té ū i sè-hàn o̍h kiânn ê siòng-phìnn
尾仔孫仔度晬
bué-á sun-á tōo-tsè
伊恬恬哭規暝
I tiām-tiām khàu kui mî
1989年
It kiú pat kiú nî
綴著船隻對金門轉去
tuè tio̍h tsûn tsiah tuì Kim-mn̂g tńg–khì
舊時的路佮親情已經袂認得
kū sī ê lōo kap tshin-tsiânn í-king buē jīn-tit
親愛的母親已經離開幾落年
tshin-ài ê bóo-tshin í-king lî-khui kuí-lo̍h nî
細漢的記持
sè-hàn ê kì-tî
敢若是頂世人的代誌
ká-ná sī tíng-sì-lâng ê tāi-tsì
來來去去有歡喜嘛有傷悲
lâi-lâi-khì-khì ū huann-hí mā ū siong-pi
應無所住的青春值幾兩銀
ìn bû sóo tsū ê tshing-tshun ta̍t kuí niú gîn
阿 故鄉是淺淺的海水
ah kòo-hiong sī tshián tshián ê hái-tsuí
彼个艱苦的時代漸漸過去
hit ê kan-khóo ê sî-tāi tsiām-tsiām kuè-khì
伊嘛佇南京的路頂湠葉生根
I mā tī Lâm-kiann ê lōo tíng thuànn hio̍h senn-kin
倒轉去已經無遐爾要緊
tò-tńg–khì í-king bô hiah-nī iàu-kín
啊 故鄉是淺淺的海水
ah kòo-hiong sī tshián tshián ê hái-tsuí
想欲走揣的所在到底佇佗位
siūnn beh tsáu-tshuē êsóo-tsāi tàu-té tī tó-uī
一座島嶼解說伊的後半生
tsi̍t tsō tó-sū kái-sueh I ê āu puànn sinn
無風 無雨 抑無湧
bô hong bô hōo ia̍h bô íng
2019年
jī khòng it kiú nî
故鄉已經是遙遠的代誌
kòo-hiong í-king sīiâu-uán ê tāi-tsì
陪伴伊 只有夕陽佮搖椅
puê-phuānn I tsí-ū si̍k-iông kap iâu í
搖啊搖 搖去伊的1929年
iô ah iô iô khì i ê it kiú jī kiú nî
