痴情的少女
《痴情的少女》Tshi-tsîng ê Siàu-lú
楊秀蘭Iûnn Siù-lân
——————————————
自從彼日來分開
tsū-tsiông hit-ji̍t lâi hun-khui
已經過了一禮拜
í-king kuè-liáu tsi̍t lé-pài
伊講叫阮後禮拜
i kóng kiò gún āu lé-pài
踮在公園涼亭內
tiàm-tsāi kong-hn̂g liâng-tîng lāi
害阮規暝等無來
hāi gún kui-mî tán-bô lâi
暗暗吐氣心悲哀
àm-àm thóo-khuì sim pi-ai
嗯~恨伊對阮無實在
ngh~ hūn i tuì gún bô si̍t-tsāi
天頂的月娘啊
thinn-tíng ê ge̍h-niû–ah
毋好笑痴獃
m̄-hó tshiò tshi-gâi
歡喜會得再相見
huann-hí ē-tit tsài sio-kìnn
已經等到規半暝
í-king tán-kàu kui puànn-mî
害阮為伊亂心機
hāi gún uī i luān sim-ki
珠淚點點流袂離
tsu-luī tiám-tiám lâu buē-lī
想欲看破轉來去
siūnn-beh khuànn-phuà tńg–lâi-khì
毋過心情放袂離
m̄-koh sim-tsîng pàng buē-lī
嗯~恨伊對阮假情義
ngh~ hūn i tuì gún ké-tsîng-gī
天頂的月娘啊
thinn-tíng ê ge̍h-niû–ah
毋好笑微微
m̄-hó tshiò bî-bî
公園內面暗風透
kong-hn̂g lāi-bīn àm-hong thàu
害阮規暝來等候
hāi gún kui-mî lâi tán-hāu
實在予人想袂到
si̍t-tsāi hōo-lâng siūnn bē-kàu
一去煞來無回頭
it-khì suah lâi bô huê-thâu
一片真情變水泡
tsi̍t-phìnn tsin-tsîng piàn tsuí-phau
想著心酸目屎流
siūnn-tio̍h sim-sng ba̍k-sái lâu
嗯~恨伊一直無回頭
ngh~ hūn i it-ti̍t bô huê-thâu
天頂的月娘啊
thinn-tíng ê ge̍h-niû–ah
毋好看阮吼
m̄ hó-khuànn gún háu
