望鄉的列車
《望鄉的列車》Bāng-hiong ê Lia̍t-tshia
陳夏蓮Tân Hā-liân
——————————————
坐著南下
tsē tio̍h lâm-hā
暗班的列車
àm-pan ê lia̍t-tshia
心肝歡喜也驚惶
sim-kuann huann-hí iā kiann-hiânn
欲轉去媽媽遐
beh tńg-khì má-mah hia
足久無聯絡的親情
tsiok kú bô liân-lo̍k ê tshin-tsiânn
想恁呢
siūnn lín–neh
這陣心痠軟疼
tsit-tsūn sim sng-nńg thiànn
南下的夜行車
lâm-hā ê iā-hîng-tshia
隨身行李疊滿滿
suî-sin hîng-lí thia̍p muá-muá
攏總是
lóng-tsóng sī
為怹攢的物件
uī in tshuân ê mi̍h-kiānn
天倫樂等佇遐
thian-lûn-lo̍k tán tī hia
寸草心惜命命
tshùn-tsháu-sim sioh-miā-miā
我有真濟話
guá ū tsin tsuē uē
欲講予恁聽
beh kóng hōo lín thiann
這幾年出外的心聲
tsit kuí nî tshut-guā ê sim-siann
