離鄉的旅客
《離鄉的旅客》Lî-hiong ê Lí-kheh
陳芬蘭Tân Hun-lân
——————————————
抱著酸苦的心情
phāu tio̍h sng-khóo ê sim-tsîng
來離開故鄉
lâi lī-khui kòo-hiong
沿路總是毋願露出
iân-lōo tsóng–sī m̄-guān lōo-tshut
暗淡的愁容
àm-tām ê tshiû-iông
柴油快車的內面
tshâ-iû-khuài-tshia ê lāi-bīn
設備造作真向陽
siat-pī tsō-tsok tsin hiòng-iông
紅男綠女滿滿是
hông-lâm li̍k-lú muá-muá-sī
交頭接耳心樂暢
kau-thâu tsiap-ní sim lo̍k-thiòng
只有阮一个
tsí-ū gún tsi̍t-ê
啊~心內悲傷
ah~ sim-lāi pi-siong
車入深坑跑山崙
tshia ji̍p tshim-khinn pháu suann-lūn
又來走海邊
iū lâi tsáu hái-pinn
窗外風景真正清幽
thang-guā hong-kíng tsin-tsiànn tshing-iu
色彩紅藍青
sik-tshái âng-lâm-tshinn
柴油快車載著阮
tshâ-iû-khuài-tshia tsài tio̍h gún
向著前程一直去
hiòng tio̍h tsiân-tîng it-ti̍t khì
外面鳥隻輕跳弄
guā-bīn tsiáu-tsiah khin thiàu-lāng
內面歌聲動人耳
lāi-bīn kua-siann tōng lâng hīnn
只有阮一个
tsí-ū gún tsi̍t-ê
啊~心頭空虛
ah~ sim-thâu khang-hi
日落黃昏天漸暗
ji̍t-lo̍h hông-hun thinn tsiām àm
清風吹入窗
tshing-hong tshue ji̍p thang
山邊燈光閃來閃去
suann-pinn ting-kng siám-lâi-siám-khì
親像螢火蟲
tshin-tshiūnn îng-hué-thâng
柴油快車聲響亮
tshâ-iû-khuài-tshia siann hiáng-liāng
載著幸福載希望
tsài tio̍h hīng-hok tsài hi-bāng
逐个宛然坐搖籃
ta̍k-ê uán-jiân tsē iô-nâ
搖來搖去心輕鬆
iô-lâi-iô-khì sim khin-sang
只有阮一个
tsí-ū gún tsi̍t-ê
啊~心情沉重
ah~ sim-tsîng tîm-tāng
