我奉陪
《我奉陪》Guá Hōng-puê
郭忠祐Kueh Tiong-iū
——————————————
毋捌講抽退
m̄-bat kóng thiu-thè
毋捌講反悔
m̄-bat kóng huán-hué
就算講
tiō-sǹg-kóng
艱苦歹過
kan-khóo pháinn-kuè
傷痕埋佇深坑
siong-hûn tâi tī tshim-khenn
沃著堅持的血
ak tio̍h kian-tshî ê hueh
就會開花
tiō ē khui-hue
偌濟的笑詼
guā-tsuē ê tshiò-khue
偌濟的鼓勵
guā-tsuē ê kóo-lē
囥心底
khǹg sim-té
一點一滴
tsi̍t-tiám-tsi̍t-tih
攏總是體會
lóng-tsóng sī thé-huē
偌濟的坎坷
guā-tsuē ê khám-khia̍t
偌濟的挑戰
guā-tsuē ê thiau-tsiàn
這一切
tse it-tshè
我會拚過
guá ē piànn–kuè
我會迒過
guá ē hānn–kuè
毋管愛偌久
m̄-kuán ài guā kú
我奉陪
guá hōng-puê
(偌濟)偌濟
(guā-tsuē) guā-tsuē
我攏奉陪
guá lóng hōng-puê
—
一點一滴體會
tsi̍t-tiám-tsi̍t-tih thé-huē
這一切
tse it-tshè
我拚過
guá piànn–kuè
我迒過
guá hānn–kuè
偌濟
guā-tsuē
偌濟鼓勵
guā-tsuē kóo-lē
囥心底
khǹg sim-té
