藍色的手巾
《藍色的手巾》Nâ-sik ê Tshiú-kin
海莉Hái-lī
——————————————
啊~可愛的人
ah~ khó-ài ê lâng
伊是我的愛人
i sī guá ê ài-jîn
花棚跤的定情
hue-pînn kha ê ting-tsîng
難道你來放袂記
lân-tō lí lâi pàng-buē-kì
害阮心悲悽唷
hāi gún sim pi-tshi–iooh
留下藍色的手巾
lâu-hā nâ-sik ê tshiú-kun
增加阮相思
tsing-ka gún siunn-si
所約束的言語句句
sóo iok-sok ê giân-gí kù-kù
永遠親像在耳邊
íng-uán tshin-tshiūnn tsāi hīnn-pinn
啊~可愛的人
ah~ khó-ài ê lâng
伊是我的愛人
i sī guá ê ài-jîn
冬天已經過去
tang-thinn í-king kuè–khì
花蕊又閣再開放
hue-luí iū-koh tsài khui pàng
哪會揣無你唷
ná ē tshuē-bô lí–iooh
提出藍色的手巾
the̍h tshut nâ-sik ê tshiú-kun
拭著阮目屎
tshit tio̍h gún ba̍k-sái
攑頭看著
gia̍h-thâu khuànn-tio̍h
浮雲片片
phû-hûn phìnn-phìnn
思念過去心纏綿
su-liām kuè-khì sim tînn-mî
啊~可愛的人
ah~ khó-ài ê lâng
伊是我的愛人
i sī guá ê ài-jîn
天頂孤雁飛過
thinn-tíng koo-gān pe–kuè
親像是你的形影
tshin-tshiūnn sī lí ê hîng-iánn
予阮閣想起唷
hōo gún koh siūnn-khí–iooh
看著藍色的手巾
khuànn-tio̍h nâ-sik ê tshiú-kun
加添阮哀悲
ka-thiam gún ai-pi
手來牽著幼囝細細
tshiú lâi khan-tio̍h iù-kiánn suè-suè
甘願一生等待你
kam-guān it-sing tán-thāi lí
