愛情的十字路口
《愛情的十字路口》Ài-tsîng ê Si̍p-jī-lōo-kháu
馬沙Má-sa
——————————————
水銀燈照出我
tsuí-gûn-ting tsiò tshut guá
孤單的人影
koo-tuann ê lâng-iánn
踮在愛情十字路口
tiàm-tsāi ài-tsîng si̍p-jī-lōo-kháu
靜靜徛
tsīng-tsīng khiā
一直想
it-ti̍t siūnn
一直想
it-ti̍t siūnn
嗯~一直想
ngh~ it-ti̍t siūnn
約束的時間
iok-sok ê sî-kan
已經超過兩三點鐘久
í-king tshiau-kè nn̄g-sann tiám-tsing kú
猶未看著你形影
iáu-bē khuànn-tio̍h lí hîng-iánn
啊~害我心痛疼
ah~ hāi guá sim thàng-thiànn
↓↓(口白)—(口白)—(口白)↓↓
小玲
Sió-lîng
自從流星之夜彼一暗
tsū-tsiông liû-tshinn tsi iā hit tsi̍t-àm
你恬恬離開我的身邊
lí tiām-tiām lī-khui guá ê sin-pinn
到如今
kàu jû-kim
已經是三四年囉
í-king sī sann-sì nî–looh
這段的光陰
tsit tuānn ê kong-im
你敢知影
lí kám tsai-iánn
馬沙踮在愛情的十字路口
Má-sah tiàm-tsāi ài-tsîng ê si̍p-jī-lōo-kháu
受了多少的
siū liáu to-siáu ê
打擊折磨咧
tá-kik tsiat-buâ–leh
一年過一年
tsi̍t-nî kè tsi̍t-nî
北風的摧割
pak-hong ê tshui-kuah
閒人的恥笑
îng-lâng ê thí-tshiò
毋過我總認為
m̄-koh guá tsóng jīn-uî
真實的愛情
tsin-si̍t ê ài-tsîng
是專一的
sī tsuan-tsi̍t–ê
所以我猶原
sóo-í guá iu-guân
照樣咧等待你
tsiàu-iūnn teh tán-thāi lí
昨暝突然間
tsa-mî tu̍t-jiân-kan
接著你的電話
tsiap-tio̍h lí ê tiān-uē
約束今仔日
iok-sok kia̋nn-ji̍t
欲踮在咱的舊所在
beh tiàm-tsāi lán ê kū sóo-tsāi
水銀燈下的小路會面
tsuí-gûn-ting hā ê sió-lōo huē-bīn
確實予我
khak-si̍t hōo guá
毋敢相信講是事實啦
m̄-kánn siong-sìn kóng sī sū-si̍t–lah
但是現時雙喜的薰
tān-sī hiān-sî siang-hí ê hun
我已經燒去兩包外
guá í-king sio khì nn̄g-pau guā
猶原猶未見著你的形影
iu-guân iáu-bē kìnn-tio̍h lí ê hîng-iánn
你敢會閣再予我失望
lí kám ē koh-tsài hōo guá sit-bōng
甘心將著
kam-sim tsiong tio̍h
我這粒復活的心
guá tsit lia̍p ho̍k-ua̍h ê sim
提去擲落大海是毋
the̍h-khì tàn lo̍h tuā-hái sī–m̄
↑↑(口白)—(口白)—(口白)↑↑
天頂的粒粒星
thinn-tíng ê lia̍p-lia̍p tshinn
敢是咧笑我
kám-sī teh tshiò guá
笑我這个痴情男兒
tshiò guá tsit ê tshi-tsîng lâm-jî
影孤單
iánn koo-tuann
為怎樣
uī-tsuánn-iūnn
為怎樣
uī-tsuánn-iūnn
嗯~為怎樣
ngh~ uī-tsuánn-iūnn
雙喜薰一枝一枝
siang-hí hun tsi̍t-ki-tsi̍t-ki
已經燒去兩包外
í-king sio khì nn̄g-pau guā
時間也是三點半
sî-kan iā-sī sann-tiám-puànn
啊~敢袂想按怎
ah~ kám buē siūnn án-tsuánn
淒涼的露水風
tshe-liâng ê lōo-tsuí hong
伴我到深夜
phuānn guá kàu tshim-iā
踮在愛情十字路口
tiàm-tsāi ài-tsîng si̍p-jī-lōo-kháu
靜靜看
tsīng-tsīng khuànn
佇咧想
tī-teh siūnn
佇咧想
tī-teh siūnn
嗯~佇咧想
ngh~ tī-teh siūnn
到底是為了按怎
tàu-tué sī uī liáu án-tsuánn
天色已經漸漸光
thinn-sik í-king tsiām-tsiām kng
猶未看著伊形影
iáu-bē khuànn-tio̍h i hîng-iánn
啊~害我疼心肝
ah~ hāi guá thiànn sim-kuann
