惜囝
《惜囝》Sioh-kiánn
阿錡A-kî
——————————————
手抱我的心肝仔囝
tshiú phō guá ê sim-kuann-á kiánn
阿母共你惜命命
a-bú kā lí sioh-miā-miā
阿爸為你去拍拚
a-pah uī lí khì phah-piànn
望你健康第一名
bāng lí kiān-khong tē-it-miâ
手攬我的心肝仔囝
tshiú lám guá ê sim-kuann-á kiánn
大風大雨咱毋驚
tuā-hong tuā-hōo lán m̄-kiann
阿母用心共你疼
a-bú iōng-sim kā lí thiànn
望你成人心端正
bāng lí tsiânn-lâng sim tuan-tsiànn
共囝抱牢牢
kā kiánn phō tiâu-tiâu
鹹酸苦澀無了了
kiâm-sng khóo-siap bô liáu-liáu
共囝攬牢牢
kā kiánn lám tiâu-tiâu
心內我囝上重要
sim-lāi guá kiánn siōng tiōng-iàu
共囝顧牢牢
kā kiánn kòo tiâu-tiâu
驚你寒
kiann lí kuânn
又驚你枵
iū kiann lí iau
共囝牽牢牢
kā kiánn khan tiâu-tiâu
上驚放手無了了
siōng kiann pàng-tshiú bô liáu-liáu
