成長的甘甜
《成長的甘甜》Sîng-tióng ê Kam-tinn
金門金湖國小Kim-mn̂g Kim-ôo Kok-sió
——————————————
大山跤
Tuā-suann kha
太湖邊
Thài-ôo pinn
咱的笑聲滿山墘
lán ê tshiò-siann muá suann-kînn
爸母望咱出頭天
pē-bú bāng lán tshut-thâu-thinn
親像秋月
tshin-tshiūnn tshiu-ge̍rh
圓圓圓
i̋nn-înn-înn
先生的教示斟酌聽
sian-sinn ê kà-sī tsim-tsiok thiann
若啊日頭綴咱行
ná-sâng–ah ji̍t-thâu tèr lán kiânn
步步共咱惜命命
pōo-pōo kā lán sioh-miā-miā
燒烙咱的心頭定
sio-lō lán ê sim-thâu tiānn
蜜蜂採蜜汗那流
bi̍t-phang tshái-bi̍t kuānn ná lâu
狗蟻扛米攢過年
káu-hiā kng bí tshuân kèr-nî
著趁少年愈拍拚
tio̍h thàn siàu-liân jú phah-piànn
才會愈有好名聲
tsiah ē jú ū hó miâ-siann
盡力學習日迵暝
tsīn-li̍k ha̍k-si̍p ji̍t thàng mî
健康成長滿九年
kiān-khong sîng-tióng muá káu-nî
春風吹
tshun-hong tsher
雨水滴
hōo-tsuí tih
向陽的花蕊笑微微
hiòng-iông ê hue-luí tshiò bî-bî
飽仁的蘆黍
pá-jîn ê lôo-sué
滇滇滇
ti̋nn-tīnn-tīnn
收成的滋味
siu-sîng ê tsir-bī
甜甜甜
ti̋nn-tinn-tinn
