大聲講出我愛你
《大聲講出我愛你》Tuā-siann Kóng-tshut Guá Ài Lí
玟靈Bûn-lîng
——————————————
自從彼日拄著你
tsū-tsiông hit-ji̍t tú-tio̍h lí
予我袂當放袂記
hōo guá buē-tàng pàng-buē-kì
毋管透早下晡
m̄-kuán thàu-tsá ē-poo
到暗時
kàu àm-sî
定定嘛想起你
tiānn-tiānn mā siūnn-khí lí
莫閣懷疑我的心
mài koh huâi-gî guá ê sim
莫閣拒絕我的情
mài koh kī-tsua̍t guá ê tsîng
山盟海誓
san-bîng hái-sè
咒誓算啥物
tsiù-tsuā sǹg siánn-mih
請你接受我的真情意
tshiánn lí tsiap-siū guá ê tsin tsîng-ì
堅定的心
kian-tīng ê sim
無人通比
bô-lâng thang pí
我是全心全意
guá sī tsuân-sim tsuân-ì
毋驚艱苦
m̄-kiann kan-khóo
抑是失意
ia̍h-sī sit-ì
守護佇你身邊
siú-hōo tī lí sin-pinn
千言萬語講袂盡
tshian-giân bān-gí kóng buē-tsīn
大聲講出我愛你
tuā-siann kóng-tshut guá ài lí
毋管行到海角抑天邊
m̄-kuán kiânn kàu hái-kak ia̍h thinn-pinn
我永遠陪伴你
guá íng-uán puê-phuānn lí
