懷念的港邊
《懷念的港邊》Huâi-liām ê Káng-pinn
美杏Bí-hīng
——————————————
孤一个心稀微
koo tsi̍t-ê sim hi-bî
走來黃昏的港邊
tsáu lâi hông-hun ê káng-pinn
想著彼日
siūnn-tio̍h hit-ji̍t
爸爸離開
pá-pah lī-khui
交代的言語
kau-tài ê giân-gí
叫阮著愛來拍拚
kiò gún tio̍h-ài lâi phah-piànn
毋通每日心痛疼
m̄-thang muí-ji̍t sim thàng-thiànn
伊就是行船的人
i tsiū-sī kiânn-tsûn ê lâng
時常著愛出帆去
sî-siông tio̍h-ài tshut-phâng khì
啊~爸爸出帆去
ah~ pá-pah tshut-phâng khì
心酸悲真稀微
sim sng-pi tsin hi-bî
孤單行到碼頭邊
koo-tuann kiânn kàu bé-thâu pinn
目睭金金一直看
ba̍k-tsiu kim-kim it-ti̍t khuànn
茫茫大海洋
bông-bông tuā-hái-iûnn
爸爸已經離開兩年
pá-pah í-king lī-khui nn̄g-nî
攏無批信轉鄉里
lóng bô phue-sìn tńg hiunn-lí
媽媽也每日傷悲
má-mah iā muí-ji̍t siong-pi
目屎流落澹目墘
ba̍k-sái lâu–lo̍h tâm ba̍k-kînn
啊~爸爸在哪裡
ah~ pá-pah tsāi ná-lí
心茫茫目箍紅
sim bâng-bâng ba̍k-khoo âng
珠淚流落心苦嘆
tsu-luī lâu–lo̍h sim khóo-thàn
每日期待船隻轉來
muí-ji̍t kî-thāi tsûn-tsiah tńg–lâi
期待船轉來
kî-thāi tsûn tńg–lâi
每日叫著爸爸你
muí-ji̍t kiò tio̍h pá-pah lí
到底你有聽見無
tàu-tué lí ū thiann–kìnn bô
海鳥也替阮悲傷
hái-tsiáu iā thuè gún pi-siong
流著同情的目屎
lâu tio̍h tông-tsîng ê ba̍k-sái
啊~爸爸緊轉來
ah~ pá-pah kín tńg–lâi
