婆娜娜的夢
《婆娜娜的夢》Pô-ná-ná ê Bāng
西卿Se-khing
——————————————
風吹著紅衫白裙
hong tshe tio̍h âng-sann pe̍h-kûn
搖啊搖搖動
iô–ah iô-iô-tāng
月照著真珠袚鍊
ge̍h tsiò tio̍h tsin-tsu phua̍h-liān
金鉤玉鎖閃閃亮
kim-kau gi̍k-só siám-siám-liāng
婆娜娜婆娜娜
Pô-ná-ná Pô-ná-ná
婆娜娜是伊的名
Pô-ná-ná sī i ê miâ
文雅優秀
bûn-ngá iu-siù
豔麗風姿
iām-lê hong-tsu
行來行去真迷人
kiânn-lâi-kiânn-khì tsin bê-lâng
啊~為怎樣追袂著
ah~ uī-tsánn-iūnn tui buē-tio̍h
婆娜娜的夢
Pô-ná-ná ê bāng
風吹著三尺頭毛
hong tshe tio̍h sann-tshioh thâu-mn̂g
搖啊搖搖動
iô–ah iô-iô-tāng
月照著幼白面容
ge̍h tsiò tio̍h iù-pe̍h bīn-iông
親像桃花點點紅
tshin-tshiūnn thô-hue tiám-tiám âng
婆娜娜婆娜娜
Pô-ná-ná Pô-ná-ná
婆娜娜是愛啥人
Pô-ná-ná sī ài siánn-lâng
可愛微笑
khó-ài bî-tshiò
精神目睭
tsing-sîn ba̍k-tsiu
轉來轉去真迷人
tńg-lâi-tńg-khì tsin bê-lâng
啊~為怎樣追袂著
ah~ uī-tsánn-iūnn tui buē-tio̍h
婆娜娜的夢
Pô-ná-ná ê bāng
風吹著淑女胸前
hong tshe tio̍h siok-lú hing-tsîng
心啊心活動
sim–ah sim ua̍h-tāng
月照著幼軟雙手
ge̍h tsiò tio̍h iù-nńg siang-tshiú
意啊意輕放
ì–ah ì khin pàng
婆娜娜婆娜娜
Pô-ná-ná Pô-ná-ná
婆娜娜是為啥人
Pô-ná-ná sī uī siánn-lâng
彈出琴聲
tuânn tshut khîm-siann
唱出歌詩
tshiùnn-tshut kua-si
一句一句情意重
tsi̍t-kù-tsi̍t-kù tsîng-ì tāng
啊~啥人會得了解
ah~ siánn-lâng ē-tit liáu-kái
婆娜娜的夢
Pô-ná-ná ê bāng
