傷心的夜快車
《傷心的夜快車》Siong-sim ê Iā-khuài-tshia
林慶鐘Lîm Khìng-tsiong
——————————————
來離開悲情城市
lâi lī-khui pi-tsîng siânn-tshī
看破回鄉里
khuànn-phuà huê hiunn-lí
忍耐著心酸苦味
jím-nāi tio̍h sim-sng khóo-bī
珠淚澹目墘
tsu-luī tâm ba̍k-kînn
月臺電鈴聲音響亮
gua̍t-tâi tiān-lîng siann-im hiáng-liāng
加添心哀悲
ka-thiam sim ai-pi
無情風雨吹阮身邊
bô-tsîng hong-hōo tshue gún sin-pinn
跤手冷吱吱
kha-tshiú líng-ki-ki
枉費阮真情實意
óng-huì gún tsin-tsîng si̍t-ì
這款對待伊
tsit khuán tuì-thāi i
上北的夜快車
tsiūnn-pak ê iā-khuài-tshia
車螺替阮悲
tshia-luê thuè gún pi
來離開無情城市
lâi lī-khui bô-tsîng siânn-tshī
看破回鄉里
khuànn-phuà huê hiunn-lí
怨恨你
uàn-hūn lí
也無帶念
iā bô tài-liām
一點的情義
tsi̍t-tiám ê tsîng-gī
花言巧語
hua-giân kháu-gí
害阮每日
hāi gún muí-ji̍t
為伊心綿綿
uī i sim mî-mî
如今一切已經變成
jû-kim it-tshè í-king piàn-sîng
一片的空虛
tsi̍t-phìnn ê khang-hi
枉費阮真情實意
óng-huì gún tsin-tsîng si̍t-ì
被伊擲捒去
pī i tàn-sak–khì
上北的夜快車
tsiūnn-pak ê iā-khuài-tshia
車螺替阮悲
tshia-luê thuè gún pi
來離開冷淡城市
lâi lī-khui líng-tām siânn-tshī
看破回鄉里
khuànn-phuà huê hiunn-lí
月臺邊燈火稀微
gua̍t-tâi pinn ting-hué hi-bî
親像阮失意
tshin-tshiūnn gún sit-ì
音樂聲音催阮珠淚
im-ga̍k siann-im tshui gún tsu-luī
親像雨水滴
tshin-tshiūnn hōo-tsuí tih
想起當時甜蜜情意
siūnn-khí tong-sî tinn-bi̍t tsîng-ì
心內苦無比
sim-lāi khóo bû-pí
枉費阮真情真意
óng-huì gún tsin-tsîng tsin-ì
實在戇無比
si̍t-tsāi gōng bû-pí
上北的夜車
tsiūnn-pak ê iā-tshia
車螺替阮悲
tshia-luê thuè gún pi
