勸食調
《勸食調》Khuàn-tsia̍h Tiāu
郭大誠Kueh Tāi-sîng
——————————————
一个人有一个喙
tsi̍t-ê lâng ū tsi̍t-ê tshuì
若有通食喙就開
nā ū-thang tsia̍h tshuì tiō khui
你開罔開
lí khui bóng khui
毋通食甲大肚胿
m̄-thang tsia̍h kah tuā tóo-kui
不但會拍歹胃
put-tān ē phah-pháinn uī
著去佮便所結相隨
tio̍h khì kah piān-sóo kiat-sio-suî
人講食食著愛細膩
lâng kóng tsia̍h-si̍t tio̍h-ài sè-jī
才袂中毒來致大病
tsiah buē tiòng-to̍k lâi tì tuā-pīnn
紅棗食了閣食鱔魚
âng-tsó tsia̍h liáu koh tsia̍h siān-hî
你頭毛會落甲是無半枝
lí thâu-mn̂g ē lak kah sī bô puànn-ki
啉燒酒袂使配紅柿
lim sio-tsiú buē-sái phuè âng-khī
紅柿嘛袂使配鰇魚
âng-khī mā buē-sái phuè jiû-hî
田螺袂使去炒木耳
tshân-lê buē-sái khì tshá bo̍k-ní
你若歁歁閣毋知死
lí nā khám-khám koh m̄-tsai-sí
食了你著愛揣先生喔
tsia̍h liáu lí tio̍h-ài tshē sian-sinn–ooh
蔥頭狗肉是咱較莫
tshang-thâu káu-bah sī lán khah mài
彼食落去到地是會起歹
he tsia̍h lo̍h-khì kàu-tè sī ē khí-pháinn
彼田螺豬肉是真厲害
he tshân-lê ti-bah sī tsin lī-hāi
相摻食著會落目眉
sio-tsham tsia̍h-tio̍h ē lak ba̍k-bâi
健康身體是人人愛
kiān-khong sin-thé sī lâng-lâng ài
相剋食物是愛了解
sio-khik si̍t-bu̍t sī ài liáu-kái
大人教予囡仔知
tuā-lâng kà hōo gín-á tsai
你著愛注意才應該
lí tio̍h-ài tsù-ì tsiah ing-kai
講著大麵是炒田螺
kóng-tio̍h tuā-mī sī tshá tshân-lê
食落去到地是上哭爸
tsia̍h lo̍h-khì kàu-tè sī siōng khàu-pē
便所佮你是結夫妻喔
piān-sóo kah lí sī kiat hu-tshe–ooh
你著去便所歕鼓吹
lí tio̍h khì piān-sóo pûn kóo-tshe
列位朋友恁聽詳細
lia̍t-uī pîng-iú lín thiann siông-sè
彼韭菜牛肉是莫食做伙
he kú-tshài gû-bah sī mài tsia̍h tsò-hué
彼田螺也莫配番麥
he tshân-lê iā mài phuè huan-be̍h
食竹筍毋通配麥芽
tsia̍h tik-sún m̄-thang phuè be̍h-gê
彼蜂蜜袂用得?豆花喔
he phang-bi̍t buē-īng-eh kûn tāu-hue–ooh
蝦仔袂用得炒金瓜
hê-á buē-īng-eh tshá kim-kue
彼塗豆袂用得炒黃瓜
he thôo-tāu buē-īng-eh tshá n̂g-kue
食冰袂使配田螺
tsia̍h ping buē-sái phuè tshân-lê
彼食茄袂使配毛蟹
he tsia̍h kiô buē-sái phuè môo-hē
相剋食物是有真濟
sio-khik si̍t-bu̍t sī ū tsin tsē
欲食著愛想詳細
beh tsia̍h tio̍h-ài siūnn siông-sè
隨人著愛顧身體
suî lâng tio̍h-ài kòo sin-thé
性命健康是咱的
sìnn-miā kiān-khong sī lán ê
若欲清涼解毒火
nā beh tshing-liâng kái to̍k-hé
著食綠豆佮冬瓜
tio̍h tsia̍h li̍k-tāu kah tang-kue
在此欲來祝大家
tsāi-tshú beh lâi tsiok tāi-ke
身體健康
sin-thé kiān-khong
食到頭毛喙鬚白
tsia̍h kah thâu-moo tshuì-tshiu pe̍h
