田嬰
《田嬰》Tshân-inn
彭莉Phênn Lī(彭立Phênn Li̍p)
——————————————
秋天的故鄉的暗暝
tshiu-thinn ê kòo-hiong ê àm-mî
月光照阮做夢的面
gue̍h-kng tsiò gún tsuè-bāng ê bīn
老人茶的滋味
lāu-lâng-tê ê tsu-bī
聽著日本時代
thiann-tio̍h ji̍t-pún sî-tāi
阿公的未了情
a-kong ê bī-liáu tsîng
秋天的臺北的暗暝
tshiu-thinn ê Tâi-pak ê àm-mî
路燈照阮心內稀微
lōo-ting tsiò gún sim-lāi hi-bî
學都市人
o̍h too-tshī lâng
捀一杯咖啡
phâng tsi̍t-pue ka-pi
溫暖我寂寞的心情
un-luán guá tsi̍k-bo̍k ê sim-tsîng
我親像
guá tshin-tshiūnn
戇戇的田嬰
gōng-gōng ê tshân-inn
飛入繁華的都市
pue ji̍p huân-huâ ê too-tshī
對著愛
tuì-tio̍h ài
完全無防備
uân-tsuân bô hông-pī
飛袂出愛情的纏綿
pue buē-tshut ài-tsîng ê tînn-mî
啊~田嬰啊田嬰
ah~ tshân-inn–ah tshân-inn
彼雙飛真忝的翼
hit siang pue tsin thiám ê si̍t
底當時
tī-tang-sî
才會飛出夢中的天
tsiah ē pue tshut bāng-tiong ê thinn
