手中一粒沙
《手中一粒沙》Tshiú-tiong Tsi̍t-lia̍p Sua
傅振輝Pòo Tsín-hui
——————————————
聽著你講
thiann-tio̍h lí kóng
我的心是借蹛
guá ê sim sī tsioh-tuà
我的身軀是借倚
guá ê sin-khu sī tsioh uá
我的情
guá ê tsîng
像你手中彼粒沙
tshiūnn lí tshiú-tiong hit lia̍p sua
予你孤單的時有伴
hōo lí koo-tuann ê sî ū-phuānn
予你天冷的時袂寒
hōo lí thinn líng ê sî buē kuânn
等傷心若過岸
tán siong-sim nā kuè huānn
你的雙手
lí ê siang-tshiú
會放我輾落塗跤
ē pàng guá liàn lo̍h thôo-kha
揣無未來欲對佗行
tshuē-bô bī-lâi beh tuì toh kiânn
雙手的情
siang-tshiú ê tsîng
著愛看破
tio̍h-ài khuànn-phuà
啊~我為何
ah~ guá uī-hô
由在你控制運命
iû-tsāi lí khòng-tsè ūn-miā
揣無人生的感情線
tshuē-bô jîn-sing ê kám-tsîng-suànn
毋知悲傷為啥人疼
m̄-tsai pi-siong uī siánn-lâng thiànn
啊~我為何
ah~ guá uī-hô
變成你手中沙
piàn-sîng lí tshiú-tiong sua
隨風輕輕吹散
suî hong khin-khin tshue suànn
