喙脣比酒更加甜
《喙脣比酒更加甜》Tshuì-tûn Pí Tsiú Kìng-ka Tinn
黃西田N̂g Se-tiân
——————————————
星光閃爍的暗暝
tshinn-kng siám-sih ê àm-mî
春宵的好暗暝
tshun-siau ê hó àm-mî
咱兩人
lán nn̄g-lâng
盡量來啉予爽快
tsīn-liōng lâi lim hōo sóng-khuài
我看你喙䫌紅紅
guá khuànn lí tshuì-phé âng-âng
目睭又閣激微微
ba̍k-tsiu iū-koh kik bui-bui
我知影你愛予我
guá tsai-iánn lí ài hōo guá
輕輕唚一下
khin-khin tsim–tsi̍t-ē
你的喙脣好芳味
lí ê tshuì-tûn hó phang-bī
比酒閣猶較甜
pí tsiú koh iáu khah tinn
你佮我好情意
lí kah guá hó tsîng-ì
已經難分離
í-king lân hun-lî
一杯啉了又一杯
tsi̍t-pue lim liáu iū tsi̍t-pue
盡量來啉落去
tsīn-liōng lâi lim–lo̍h-khì
咱兩人來乾杯
lán nn̄g-lâng lâi kan-pue
攏無問題
lóng bô būn-tê
我想起當時佮你
guá siūnn-khí tang-sî kah lí
初次相會的暗暝
tshoo-tshù siong-huē ê àm-mî
我佮你啉酒跳舞
guá kah lí lim-tsiú thiàu-bú
快樂過一暝
khuài-lo̍k kè tsi̍t-mî
你的一切真優美
lí ê it-tshè tsin iu-bí
予我難袂記
hōo guá lân buē-kì
你佮我自彼日
lí kah guá tsū hit-ji̍t
結成好伴侶
kiat-sîng hó phuānn-lī
今夜春宵好暗暝
kim-iā tshun-siau hó àm-mî
熱情的好暗暝
jia̍t-tsîng ê hó àm-mî
咱兩人啉規暝
lán nn̄g-lâng lim kui-mî
攏無問題
lóng bô būn-tê
我看你對我
guá khuànn lí tuì guá
表示愛嬌迷人的模樣
piáu-sī ài-kiau bê-lâng ê bôo-iūnn
我知影你愛予我
guá tsai-iánn lí ài hōo guá
輕輕抱一下
khin-khin phō–tsi̍t-ē
你的態度真嬌媚
lí ê thāi-tōo tsin kiau-bī
予我昏落去
hōo guá hūn–lo̍h-khì
你佮我這世人
lí kah guá tsit-sì-lâng
永遠難分離
íng-uán lân hun-lî
