下港兄
《下港兄》Ē-káng-hiann
黃西田N̂g Se-tiân
——————————————
我是一个下港仔兄喔
guá sī tsi̍t-ê ē-káng-á-hiann–ooh
來到繁華臺北城
lâi-kàu huân-huâ Tâi-pak-siânn
為著家庭真散食
uī-tio̍h ka-tîng tsin sàn-tsia̍h
只好認真來拍拚
tsí-hó jīn-tsin lâi phah-piànn
透早出門
thàu-tsá tshut-mn̂g
心情真快活
sim-tsîng tsin khuìnn-ua̍h
手提便當
tshiú the̍h piān-tong
那行那唸歌
ná kiânn ná liām-kua
啦~碰赤赤碰赤赤
lah~ pōng-tshiah-tshiah pōng-tshiah-tshiah
那行那唸歌
ná kiânn ná liām-kua
我是一个下港仔兄喔
guá sī tsi̍t-ê ē-káng-á-hiann–ooh
做著工課上拍拚
tsuè tio̍h kang-khè siōng phah-piànn
有時感覺真喙焦
ū sî kám-kak tsin tshuì-ta
滾水啉落
kún-tsuí lim–lo̍h
就快活
tsiū khuìnn-ua̍h
為著保持快樂的心情
uī-tio̍h pó-tshî khuài-lo̍k ê sim-tsiânn
一面做工
tsi̍t-bīn tsuè-kang
一面那唸歌
tsi̍t-bīn ná liām-kua
啦~碰赤赤碰赤赤
lah~ pōng-tshiah-tshiah pōng-tshiah-tshiah
一面那唸歌
tsi̍t-bīn ná liām-kua
我是一个下港仔兄喔
guá sī tsi̍t-ê ē-káng-á-hiann–ooh
透早做到日落山
thàu-tsá tsuè kàu ji̍t lo̍h-suann
約束愛人仔看電影
iok-sok ài-jîn-á khuànn tiān-iánn
下班著愛較緊行
hā-pan tio̍h-ài khah-kín kiânn
想著愛人對我的心肝
siūnn-tio̍h ài-jîn tuì guá ê sim-kuann
一時歡喜
tsi̍t-sî huann-hí
那行那唸歌
ná kiânn ná liām-kua
啦~碰赤赤碰赤赤
lah~ pōng-tshiah-tshiah pōng-tshiah-tshiah
那行那唸歌
ná kiânn ná liām-kua
