愛無底
《愛無底》Ài Bô Té
沈芳如Sím Hong-jû
——————————————
往事若像一杯茶
óng-sū ná-tshiūnn tsi̍t-pue tê
啉落苦澀
lim–lo̍h khóo siap
滋味全牢底
tsu-bī tsuân tiâu-té
愛甲墜落萬丈深坑
ài kah tuī-lo̍h bān-tn̄g tshim-khenn
欲救毋知對佗
beh kiù m̄-tsai tuì toh peh
傷心若像一雙鞋
siong-sim ná-tshiūnn tsi̍t-siang ê
新新穿甲最後底磨平
sin-sin tshīng kah tsuè-āu té buâ pênn
想甲親像斷線風吹
siūnn kah tshin-tshiūnn tn̄g-suànn hong-tshue
飛甲毋知佗位揣
pue kah m̄-tsai tó-uī tshuē
愛你袂當表白
ài lí buē-tàng piáu-pe̍h
目屎流了規暝
ba̍k-sái lâu liáu kui-mê
雙人世界敢有阮的
siang-lâng sè-kài kám ū gún ê
你有新的天地
lí ū sin ê thinn-tē
將阮當做笑詼
tsiong gún tòng-tsuè tshiò-khue
放阮一人戇戇踅
pàng gún tsi̍t-lâng gōng-gōng se̍h
愛你愛甲超過
ài lí ài kah tshiau-kuè
痛苦無算啥貨
thòng-khóo bô-sǹg siánn-huè
害我已經失去控制
hāi guá í-king sit-khì khòng-tsè
踮在窗外徘徊
tiàm tsāi thang-guā pâi-huê
為你用盡心血
uī lí iōng-tsīn sim-hiat
敢講愛無底
kám-kóng ài bô té
