滷肉芳
《滷肉芳》Lóo-bah Phang
郭忠祐Kueh Tiong-iū
——————————————
離開厝內幾若冬
lī-khui tshù-lāi kuí-lō tang
下班的暗暝
hā-pan ê àm-mî
暗頓攏一个人食
àm-tǹg lóng tsi̍t-ê-lâng tsia̍h
想起阿母的滷肉
siūnn-khí a-bú ê lóo-bah
煮著故鄉的名
tsú tio̍h kòo-hiong ê miâ
又閣加班到深夜
iū-koh ka-pan kàu tshim-iā
行佇街仔路
kiânn tī ke-á-lōo
懷疑著為啥拍拚
huâi-gî tio̍h uī siánn phah-piànn
想著阿母的滷肉
siūnn-tio̍h a-bú ê lóo-bah
予我流著喙瀾
hōo guá lâu tio̍h tshuì-nuā
陪我孤單向前行
puê guá koo-tuann hiòng-tsiân kiânn
今夜月娘
kim-iā gue̍h-niû
猶原恬恬咧看
iu-guân tiām-tiām teh khuànn
看顧著這个戇囡仔
khuànn-kòo tio̍h tsit ê gōng gín-á
定定四界咧走傱
tiānn-tiānn sì-kè teh tsáu-tsông
食無一頓飽
tsia̍h bô tsi̍t-tǹg pá
月光照佇樓窗
gue̍h-kng tsiò tī lâu-thang
親像阿母的心疼
tshin-tshiūnn a-bú ê sim-thiànn
這个繁華臺北
tsit ê huân-huâ Tâi-pak
迷亂的城
bê-luān ê siânn
比袂過
pí bē-kuè
故鄉無尾巷仔
kòo-hiong bô-bué-hāng-á
定定徛佇門跤口
tiānn-tiānn khiā tī mn̂g-kha-kháu
就鼻著滷肉芳
tiō phīnn-tio̍h lóo-bah phang
細漢咧嫌
sè-hàn teh hiâm
變成大漢的懷念
piàn-sîng tuā-hàn ê huâi-liām
(倒轉去是我的願望)
(tò-tńg–khì sī guá ê guān-bāng)
—
我一直揣著
guá it-ti̍t tshuē tio̍h
賣滷肉的店
bē lóo-bah ê tiàm
按怎攏無相仝
án-tsuánn lóng bô sio-kāng
阿母啊
a-bú–ah
我期待你來夢中
guá kî-thāi lí lâi bāng-tiong
煮予我食
tsú hōo guá tsia̍h
