旅途慕情
《旅途慕情》Lú-tôo Bōo-tsîng
郭金發Kueh Kim-huat
白櫻Pe̍h-ing
——————————————
踏過著一切阻礙
ta̍h kè tio̍h it-tshè tsóo-gāi
毋願失意志
m̄-guān sit ì-tsì
拍開前途來完成
phah-khui tsiân-tôo lâi uân-sîng
男兒純情義
lâm-jî sûn tsîng-gī
心愛的可憐鳥兒
sim-ài ê khó-liân tsiáu-jî
到底你飛去哪裡
tàu-tué lí pe khì ná-lí
放我來孤單稀微
pàng guá lâi koo-tuann hi-bî
離開你身邊
lī-khui lí sin-pinn
溫柔的愛來感動
un-jiû ê ài lâi kám-tōng
女性的心內
lú-sìng ê sim-lāi
無疑阮來失約束
bô-gî gún lâi sit iok-sok
耽誤好將來
tam-ngōo hó tsiong-lâi
無怨恨心愛囝兒
bô uàn-hūn sim-ài kiánn-jî
阻礙著咱兩个愛
tsóo-gāi tio̍h lán nn̄g-ê ài
阮怎唱搖囝歌詩
gún tsuánn tshiùnn iô-kiánn kua-si
就來心悲哀
tsiū lâi sim pi-ai
河邊的秋風吹來
hô-pinn ê tshiu-hong tshue–lâi
搖動柳葉樹
iô-tāng liú-hio̍h tshiū
引起男兒的心內
ín-khí lâm-jî ê sim-lāi
加添了憂愁
ka-thiam liáu iu-tshiû
我相信一定啥物
guá siong-sìn it-tīng siánn-mih
束縛著你的自由
sok-pa̍k tio̍h lí ê tsū-iû
忍耐著無聊心情
jím-nāi tio̍h bô-liâu sim-tsîng
茫茫賞月娘
bâng-bâng siúnn ge̍h-niû
情愛的悲山苦崙
tsîng-ài ê pi-suann khóo-lūn
漸漸現活氣
tsiām-tsiām hiàn ua̍h-khì
已經溫柔風吹來
í-king un-jiû hong tshue–lâi
溫暖咱情意
un-luán lán tsîng-ì
定情義彼欉桂樹
tīng tsîng-gī hit tsâng kuì-tshiū
花蕊也來開滿枝
hue-luí iā lâi khui muá-ki
咱雙人完成心願
lán siang-lâng uân-sîng sim-guān
快樂過春天
khuài-lo̍k kè tshun-thinn
