流浪賣薰姑娘
《流浪賣薰姑娘》Liû-lōng Bē-hun Koo-niû
郭大誠Kueh Tāi-sîng
——————————————
臺北的圓環邊
Tâi-pak ê înn-khuân pinn
出名的夜市
tshut-miâ ê iā-tshī
路邊攤販滿滿是
lōo-pinn thuann-huàn muá-muá-sī
欲食點心免掛意
beh tsia̍h tiám-sim bián kuà-ì
有一个賣薰姑娘
ū tsi̍t-ê bē-hun koo-niû
雄雄行倚阮身邊
hiông-hiông kiânn uá gún sin-pinn
對阮來表示
tuì gún lâi piáu-sī
問阮愛啥物
mn̄g gún ài siánn-mih
無論是長壽雙喜
bô-lūn sī Tiông-siū Siang-hí
抑是葉巻き
ia̍h-sī hamaki
伊是流浪的
i sī liû-lōng ê
賣薰的姑娘
bē-hun ê koo-niû
青紅燈閃閃爍
tshinn-âng-ting siám-siám-sih
繁華的都市
huân-huâ ê too-tshī
紅男綠女滿滿是
hông-lâm li̍k-lí muá-muá-sī
獻出青春的元氣
hiàn-tshut tshing-tshun ê guân-khì
遠遠有一个姑娘
hn̄g-hn̄g ū tsi̍t-ê koo-niû
面帶笑容無憂愁
bīn tài tshiò-iông bô iu-tshiû
含情的目睭
hâm-tsîng ê ba̍k-tsiu
妖嬌的模樣
iau-kiau ê bôo-iūnn
招人客共伊交關
tsio lâng-kheh kā-i kau-kuan
買薰做朋友
bé hun tsuè pîng-iú
伊是流浪的
i sī liû-lōng ê
賣薰的姑娘
bē-hun ê koo-niû
都市的黃昏時
too-tshī ê hông-hun sî
滿街光爍爍
muá-ke kng sih-sih
人山人海滿滿是
jîn-san jîn-hái muá-muá-sī
充滿青春的暗暝
tshiong-buán tshing-tshun ê àm-mî
行過來一个姑娘
kiânn kè-lâi tsi̍t-ê koo-niû
含情帶意笑微微
hâm-tsîng tài-ì tshiò bî-bî
對阮來講起
tuì gún lâi kóng-khí
買薰的代誌
bé hun ê tāi-tsì
希望我共伊買薰
hi-bāng guá kā-i bé hun
欠用免客氣
khiàm-īng bián kheh-khì
伊就是流浪的
i tsiū-sī liû-lōng ê
賣薰的姑娘
bē-hun ê koo-niû
