肉粽王
《肉粽王》Bah-tsàng Ông
夏心Hā-sim
——————————————
自恨自嘆老歹命
tsū-hūn tsū-thàn lāu pháinn-miā
無兄無弟無某囝
bô-hiann bô-tī bô bóo-kiánn
規日拖著一台車
kui-ji̍t thua tio̍h tsi̍t-tâi tshia
街頭巷尾四界行
kue-thâu hāng-bué sì-kè kiânn
暝日來賣燒肉粽
mî-ji̍t lâi buē sio bah-tsàng
燒肉粽
sio bah-tsàng
燒肉粽
sio bah-tsàng
賣燒肉粽
buē sio bah-tsàng
世間像我無幾个
sè-kan tshiūnn guá bô kuí-ê
盤山過嶺走東西
puânn-suann kuè-niá tsáu tang-sai
每日趁錢無偌濟
muí-ji̍t thàn-tsînn bô guā-tsuē
少年活到喙鬚白
siàu-liân ua̍h kàu tshuì-tshiu pe̍h
也是來賣燒肉粽
iā-sī lâi buē sio bah-tsàng
燒肉粽
sio bah-tsàng
燒肉粽
sio bah-tsàng
賣燒肉粽
buē sio bah-tsàng
毋管東海抑西城
m̄-kuán tang-hái ia̍h se-siânn
透風落雨也著行
thàu-hong lo̍h-hōo iā tio̍h kiânn
欲等何時出頭天
beh tán hô-sî tshut-thâu-thinn
為著三頓著拚命
uī-tio̍h sann-tǹg tio̍h piànn-miā
只有來賣燒肉粽
tsí-ū lâi buē sio bah-tsàng
燒肉粽
sio bah-tsàng
燒肉粽
sio bah-tsàng
賣燒肉粽
buē sio bah-tsàng
