緣份783
《緣份783》Iân-hūn Tshit-pat-sam
張文綺Tiunn Bûn-khí
——————————————
阮兜蹛日月潭
gún tau tuà Ji̍t-gua̍t-thâm
潭水深深是思念
thâm-tsuí tshim-tshim sī su-liām
思念幾十冬
su-liām kuí-tsa̍p tang
你兜蹛九龍江
lí tau tuà Kiú-liông-kang
江水長長是牽掛
kang-tsuí tn̂g-tn̂g sī khian-kuà
牽掛到永遠
khian-kuà kàu íng-uán
你我攏是河洛人
lí guá lóng-sī Hō-ló-lâng
聽的是歌仔戲
thiann–ê sī kua-á-hì
拜的是媽祖
pài–ê sī Má-tsóo
你我攏愛聽廣播
lí guá lóng ài thiann kóng-pòo
泡茶來講古
phàu-tê lâi kóng-kóo
點歌送祝福
tiám-kua sàng tsiok-hok
相會是緣份
siong-huē sī iân-hūn
緣份七八三
iân-hūn tshit-pat-sam
歡喜情入港
huann-hí tsîng ji̍p-káng
快樂愛出帆
khuài-lo̍k ài tshut-phâng
相會是緣份
siong-huē sī iân-hūn
緣份七八三
iân-hūn tshit-pat-sam
人生路有坎坷
jîn-sing-lōo ū khám-khia̍t
咱牽手鬥陣行
lán khan-tshiú tàu-tīn kiânn
—
你我講的是河洛話
lí guá kóng–ê sī Hō-ló-uē
唐山過臺灣
Tn̂g-suann kuè Tâi-uân
一枝草一點露
tsi̍t-ki tsháu tsi̍t-tiám lōo
你我唱的是閩南歌
lí guá tshiùnn–ê sī Bân-lâm kua
愛拚才會贏
ài piànn tsiah ē iânn
一定欲成功
it-tīng beh sîng-kong
