失戀的草地郎
《失戀的草地郎》Sit-luân ê Tsháu-tē-lông
康丁Khong-ting(張錫圭Tiunn Sik-kui)
——————————————
唵著彼號失戀風
ām tio̍h hit-lō sit-luân hong
袂食袂睏
buē-tsia̍h buē-khùn
頭殼又楞楞
thâu-khak iū gông-gông
因為阮勤儉拍拚
in-uī gún khîn-khiām phah-piànn
毋敢懵懂
m̄-kánn bóng-tóng
伊嫌阮用錢無大方
i hiâm gún iōng-tsînn bô tāi-hong
啊~心頭茫茫
ah~ sim-thâu bông-bông
想伊想甲
siūnn i siūnn kah
強欲發狂
kiōng-beh huat-kông
最後阮才知
tsuè-āu gún tsiah tsai
伊嫌阮草地倯
i hiâm gún tsháu-tuē-sông
唵著彼號失戀風
ām tio̍h hit-lō sit-luân hong
拋寒拋熱
pha-kuânn pha-jia̍t
頭殼又楞楞
thâu-khak iū gông-gông
因為阮見笑
in-uī gún kiàn-siàu
情話毋敢亂講
tsîng-uē m̄-kánn luān-kóng
伊嫌阮講話無大方
i hiâm gún kóng-uē bô tāi-hong
啊~心頭茫茫
ah~ sim-thâu bông-bông
想伊想甲
siūnn i siūnn kah
強欲發狂
kiōng-beh huat-kông
最後阮才知
tsuè-āu gún tsiah tsai
伊嫌阮草地倯
i hiâm gún tsháu-tuē-sông
