夜都市之戀
《夜都市之戀》Iā Too-tshī tsi Luân
文甲Bûn-kah
——————————————
夜都市青紅燈
iā too-tshī tshinn-âng-ting
閃閃爍爍像天星
siám-siám-sih-sih tshiūnn thinn-tshinn
霓虹燈真美麗
nê-ông-ting tsin bí-lē
使人思慕的街市
sú-lâng su-bōo ê ke-tshī
初次咱相會時
tshoo-tshù lán siong-huē sî
也是踮在夜都市
iā-sī tiàm-tsāi iā too-tshī
彼當時彼个姑娘
hit-tong-sî hit ê koo-niû
對我表示好情意
tuì guá piáu-sī hó tsîng-ì
叫我永遠永遠的愛情
kiò guá íng-uán íng-uán ê ài-tsîng
啊~毋通來袂記
ah~ m̄-thang lâi buē-kì
夜都市好暗暝
iā too-tshī hó àm-mî
雙雙對對行相隨
siang-siang tuì-tuì kiânn sio-suî
月娘也笑微微
ge̍h-niû iā tshiò bî-bî
祝賀咱的初戀時
tsiok-hō lán ê tshoo-luân sî
彼一暝相會時
hit tsi̍t-mî siong-huē sî
談情說愛說不離
tâm-tsîng sueh-ài sueh put-lī
彼當時彼个姑娘
hit-tong-sî hit ê koo-niû
毋願佮我來分離
m̄-guān kah guá lâi hun-lî
叫我永遠永遠的愛情
kiò guá íng-uán íng-uán ê ài-tsîng
啊~毋通來袂記
ah~ m̄-thang lâi buē-kì
夜都市風微微
iā too-tshī hong bî-bî
月娘漸漸斜落去
ge̍h-niû tsiām-tsiām tshiâ–lo̍h-khì
音樂聲動人耳
im-ga̍k-siann tōng lâng hīnn
引人熱情的暗暝
ín lâng jia̍t-tsîng ê àm-mî
伊對我有情義
i tuì guá ū tsîng-gī
欲分離的彼一暝
beh hun-lî ê hit tsi̍t-mî
彼當時彼个姑娘
hit-tong-sî hit ê koo-niû
目屎強欲流落去
ba̍k-sái kiông-bueh lâu–lo̍h-khì
叫我永遠永遠的愛情
kiò guá íng-uán íng-uán ê ài-tsîng
啊~毋通來袂記
ah~ m̄-thang lâi buē-kì
