每一冬的每一日
《每一冬的每一日》Muí Tsi̍t-tang ê Muí Tsi̍t-ji̍t
荒山亮Hong-san Liāng
——————————————
望向天頂的星
bāng hiòng thinn-tíng ê tshinn
想著遠方的你
siūnn-tio̍h uán-hong ê lí
看著路燈黃黃
khuànn-tio̍h lōo-ting n̂g-n̂g
照著思念微微
tsiò-tio̍h su-liām bî-bî
這个戇戇的人
tsit ê gōng-gōng ê lâng
毋知欲對佗去
m̄-tsai beh tuì toh khì
徛佇冷冷港邊
khiā tī líng-líng káng-pinn
想起過去甜蜜
siūnn-khí kuè-khì tinn-bi̍t
搧著鹹鹹的風
siàn-tio̍h kiâm-kiâm ê hong
唸著你的名字
liām tio̍h lí ê miâ-jī
時間偷偷溜去
sî-kan thau-thau liu–khì
你敢猶閣會記
lí kám iáu-koh ē-kì
咱分開彼一日
lán hun-khui hit-tsi̍t-ji̍t
我的目屎那滴
guá ê ba̍k-sái ná tih
你用溫柔聲音
lí iōng un-jiû siann-im
輕輕予我安慰
khin-khin hōo guá an-uì
我的毋甘
guá ê m̄-kam
寄佇天邊彼粒流星
kià tī thinn-pinn hit lia̍p liû-tshinn
每一冬的每一日
muí tsi̍t-tang ê muí tsi̍t-ji̍t
我攏會想起你
guá lóng ē siūnn-khí lí
這款分開滋味
tsit khuán hun-khui tsu-bī
叫我怎樣慣勢
kiò guá tsuánn-iūnn kuàn-sì
毋管幾年過去
m̄-kuán kuí nî kuè–khì
我嘛永遠愛你
guá mā íng-uán ài lí
