予最可恨的彼个人
《予最可恨的彼个人》Hōo Siōng Khó-hūn ê Hit ê Lâng
純情Sûn-tsîng
——————————————
為著彼个採花男性
uī-tio̍h hit ê tshái-hue lâm-sìng
耽誤了一生
tam-gōo liáu it-sing
阮才著踮在酒場
gún tsiah tio̍h tiàm-tsāi tsiú-tiûnn
夜夜嘆悲情
iā-iā thàn pi-tsîng
親像今夜冷冰冰
tshin-tshiūnn kim-iā líng-ping-ping
刺激燒酒啉無停
tshì-kik sio-tsiú lim bô-thîng
燒酒愈啉愈怨恨
sio-tsiú jú lim jú uàn-hūn
怨恨著彼个人
uàn-hūn tio̍h hit ê lâng
阮一生最可惡的人
gún it-sing tsuè khó-ònn ê lâng
初次見面假做紳士
tshoo-tshù kìnn-bīn ké-tsuè sin-sū
對阮真溫柔
tuì gún tsin un-jiû
騙了後
phiàn liáu-āu
反面無常
huán-bīn bû-siông
束縛阮自由
sok-pa̍k gún tsū-iû
啥人親像阮遮戇
siánn-lâng tshin-tshiūnn gún tsiah gōng
哪會遮爾無目睭
ná ē tsiah-nī bô ba̍k-tsiu
純情的人阮無愛
sûn-tsîng ê lâng gún bô-ài
偏偏愛彼个人
phian-phian ài hit ê lâng
阮一生最可惡的人
gún it-sing tsuè khó-ònn ê lâng
專門想欲破害女性
tsuan-bûn siūnn-beh phò-hāi lú-sìng
寶貴的青春
pó-kuì ê tshing-tshun
用彼套惡毒手段
iōng hit thò ok-to̍k tshiú-tuānn
戲弄阮情份
hì-lāng gún tsîng-hūn
算來一切是命運
sǹg–lâi it-tshè sī miā-ūn
欲對啥人來理論
beh tuì siánn-lâng lâi lí-lūn
燒酒愈啉愈怨恨
sio-tsiú jú lim jú uàn-hūn
怨恨著彼个人
uàn-hūn tio̍h hit ê lâng
阮一生最可惡的人
gún it-sing tsuè khó-ònn ê lâng
