紅心
《紅心》Âng Sim
高向鵬Ko Hiòng-phîng
——————————————
你的心親像
lí ê sim tshin-tshiūnn
小船漂流海上
sió-tsûn phiau-liû hái-siōng
我的心等待你
guá ê sim tán-thāi lí
轉來靠岸
tńg-lâi khò-huānn
阮也定定踮佇遮
gún iā tiānn-tiānn tiàm tī tsia
只有海風來做伴
tsí-ū hái-hong lâi tsuè-phuānn
唱著昔日初戀
tshiùnn tio̍h sik-ji̍t tshoo-luân
海邊的情歌
hái-pinn ê tsîng-kua
無意中聽見
bô-ì-tiong thiann-kìnn
海鳥陣陣叫聲
hái-tsiáu tsūn-tsūn kiò-siann
毋知伊敢是無伴
m̄-tsai i kám-sī bô phuānn
咧孤單
teh koo-tuann
看伊飛來又飛去
khuànn i pue-lâi iū pue-khì
心內到底想啥物
sim-lāi tàu-té siūnn siánn-mih
煞來想起當時
suah lâi siūnn-khí tong-sî
心內情綿綿
sim-lāi tsîng mî-mî
一粒紅紅心肝
tsi̍t-lia̍p âng-âng sim-kuann
永遠踮在阮的身上蹛
íng-uán tiàm-tsāi gún ê sin-siōng tuà
請你相信
tshiánn lí siong-sìn
我袂無情來變卦
guá buē bô-tsîng lâi piàn-kuà
一粒紅紅心肝
tsi̍t-lia̍p âng-âng sim-kuann
為情為愛
uī tsîng uī ài
受盡著拖磨
siū-tsīn tio̍h thua-buâ
無論海水會焦
bô-lūn hái-tsuí ē ta
石頭也會爛
tsio̍h-thâu iā ē nuā
怎樣情海袂穩定
tsuánn-iūnn tsîng-hái buē ún-tīng
希望你也會知影
hi-bāng lí iā ē tsai-iánn
阮這粒紅心
gún tsit lia̍p âng sim
猶原也留佇遮
iu-guân iā lâu tī tsia
