蜈蚣嫁翁
《蜈蚣嫁翁》Giâ-kang Kè-ang
紀淑玲Kí Siok-lîng
——————————————
蜈蚣小姐欲嫁翁
giâ-kang sió-tsiá beh kè-ang
新鞋攏總一百雙
sin-uê lóng-tsóng tsi̍t-pah siang
鞋帶縛好又閣鬆
uê-tuà pa̍k hó iū-koh sang
新郎門口一直等
sin-lông mn̂g-kháu it-ti̍t tán
對天光等到天暗
uì thinn kng tán-kàu thinn àm
對春夏等到秋天
uì tshun-hā tán-kàu tshiu-thinn
蜈蚣動作有夠慢
giâ-kang tōng-tsok ū-kàu bān
新郎等到變老人
sin-lông tán-kàu piàn lāu-lâng
