濁水都市
《濁水都市》Lô Tsuí Too-tshī
茄子蛋(茄仔卵 Kiô-á-nn̄g)
——————————————
對面豪城家具店
tuì-bīn Hô-siânn ka-kū tiàm
猶原佇遐
iu-guân tī hia
細漢歡喜走動的騎樓
sè-hàn huann-hí tsáu-tōng ê khiâ-lâu
攏賰烏肚䆀
lóng tshun oo-tóo-bái
停咧門口
thîng teh mn̂g-kháu
菜園後面的曠野
tshài-hn̂g āu-bīn ê khòng-iá
已經聽無囡仔的聲
í-king thiann-bô gín-á ê siann
隔壁的彼間火鍋店
keh-piah ê hit king hué-ko tiàm
毋知換過幾若攤
m̄-tsai uānn kuè kuí-lō thuann
懷念外口的燕仔
huâi-liām guā-kháu ê ìnn-á
九年無來歇
káu-nî bô lâi hioh
茄苳路的
Ka-tang-lōo ê
溪邊石頭無變
khe-pinn tsio̍h-thâu bô-piàn
煞無田嬰
suah bô tshân-inn
咧自由自在
teh tsū-iû tsū-tsāi
花店內面的少女
hue-tiàm lāi-bīn ê siàu-lú
煩惱掩崁伊的笑容
huân-ló am-khàm i ê tshiò-iông
路邊國小的同學
lōo-pinn kok-sió ê tông-o̍h
熟似煞毋敢拍招呼
si̍k-sāi suah m̄-kánn phah-tsio-hoo
故鄉
kòo-hiong
大樓親像憂愁
tuā-lâu tshin-tshiūnn iu-tshiû
風景
hong-kíng
面容無奈一樣
bīn-iông bô-nāi tsi̍t-iūnn
走揣囡仔時的故事
tsáu-tshuē gín-á-sî ê kòo-sū
背影遐爾仔無掛慮
puē-iánn hiah-nī-á bô kuà-lū
喔~時間的洪流
ooh~ sî-kan ê âng-liû
將過去的模樣
tsiong kuè-khì ê bôo-iūnn
攏沖進了基隆河
lóng tshiâng tsìn liáu Ke-lâng-hô
色彩的變化
sik-tshái ê piàn-huà
佮土地的芳味
kah thóo-tē ê phang-bī
毋知你感覺著無
m̄-tsai lí kám-kak–tio̍h bô
袂開的烏雲
buē khui ê oo-hûn
佮袂開的花蕊
kah buē khui ê hue-luí
心內像河水濁濁
sim-lāi tshiūnn hô-tsuí lô-lô
