青春的街市
《青春的街市》Tshing-tshun ê Ke-tshī
文夏Bûn-hā
——————————————
白花蕊
pe̍h hue-luí
粉紅花蕊
hún-âng hue-luí
青春的花蕊
tshing-tshun ê hue-luí
一陣陣春風
tsi̍t-tīn-tīn tshun-hong
吹來芬芳滿街市
tshue lâi hun-hong muá ke-tshī
阮佮你歡歡喜喜
gún kah lí huann-huann-hí-hí
手牽手行相倚
tshiú khan-tshiú kiânn sio-uá
欣賞著初戀的滋味
him-sióng tio̍h tshoo-luân ê tsu-bī
滿街路雙雙對對
muá ke-lōo siang-siang tuì-tuì
行甲真趣味
kiânn kah tsin tshù-bī
滿街路雙雙對對
muá ke-lōo siang-siang tuì-tuì
講甲糖蜜甜
kóng kah thn̂g-bi̍t-tinn
充滿著快樂的
tshiong-buán tio̍h khuài-lo̍k ê
充滿著希望的
tshiong-buán tio̍h hi-bāng ê
青春的街市
tshing-tshun ê ke-tshī
霓虹燈閃閃爍爍
nê-ông-ting siám-siám-sih-sih
黃昏的街市
hông-hun ê ke-tshī
一陣陣暗風吹來
tsi̍t-tīn-tīn àm-hong tshue–lâi
雺霧罩四邊
bông-bū tà sì-pinn
彼當時佮你分開
hit-tong-sî kah lí hun-khui
猶原是像今夜
iu-guân sī tshiūnn kim-iā
罩雺霧稀微的暗暝
tà bông-bū hi-bî ê àm-mî
滿街路雙雙對對
muá ke-lōo siang-siang tuì-tuì
行甲真趣味
kiânn kah tsin tshù-bī
滿街路雙雙對對
muá ke-lōo siang-siang tuì-tuì
快樂笑微微
khuài-lo̍k tshiò bî-bî
只有是阮孤單
tsí-ū sī gún koo-tuann
只有是阮無伴
tsí-ū sī gún bô-phuānn
青春的街市
tshing-tshun ê ke-tshī
無論是花蕊滿開
bô-lūn sī hue-luí muá-khui
抑是花落塗
ia̍h-sī hue lo̍h-thôo
猶原是充滿熱情
iu-guân sī tshiong-buán jia̍t-tsîng
青春的街路
tshing-tshun ê ke-lōo
孤一个來到這條
koo tsi̍t-ê lâi-kàu tsit tiâu
初戀時難忘的
tshoo-luân sî lân-bōng ê
永遠是懷念的街路
íng-uán sī huâi-liām ê ke-lōo
滿街路雙雙對對
muá ke-lōo siang-siang tuì-tuì
行甲真趣味
kiânn kah tsin tshù-bī
滿街路雙雙對對
muá ke-lōo siang-siang tuì-tuì
快樂情綿綿
khuài-lo̍k tsîng mî-mî
充滿著愛情的
tshiong-buán tio̍h ài-tsîng ê
充滿著戀夢的
tshiong-buán tio̍h luân-bāng ê
青春的街市
tshing-tshun ê ke-tshī
